مەسرور بارزانی: ئەوانەی دژایەتیی 'هەژماری من'یان دەکرد ئەمڕۆ بانگەشەی پێوە دەکەن

ئاڤا نیوز

جێگری سەرۆکی پارتی دیموکراتی کوردستان، لە میانی بانگەشەی هەڵبژاردنی لیستی 275 لە ئامێدی وتی: هەندێک لایەن دژایەتیی پڕۆژەی هەژماری منیان کرد، ئەمڕۆ خۆیان بەم پڕۆژەیە هەڵدەکێشن و بانگەشەی پێوە دەکەن.

وێنە گەورەکە: ڕۆژی چوارشەممە 22-10-2025، بە ئامادەبوونی مەسرور بارزانی، جێگری سەرۆکی پارتی دیموکراتی کوردستان، نەخۆشخانەی 100 قەرەوێڵەیی لە ئامێدی کرایەوە، دواتر لە ئاهەنگی بانگەشی هەڵبژاردن وتارێکی پێشکەش کرد و تیشکی خستەسەر چەند بابەتی گرنگ.

لێدوانی فەرمی: مەسرور بارزانی، جێگری سەرۆکی پارتی دیموکراتی کوردستان ڕایگەیاند: یەکێک لەو پڕۆژانەی پێویستبوو و پێداگریمان لەسەر کرد، پڕۆژەی 'هەژماری من' بوو، بەڵام زۆر دژایەتیی کرا، ئەمڕۆ ئەوانەی دژایەتییان دەکرد خۆیانی پێوە هەڵدەکێشن.

جێگری سەرۆکی پارتی وتیشی، پڕۆژەی 'هەژماری من' تەنیا ئەوە نییە کە مووچە خۆر بچێت مووچەی لێ وەربگرێت، بەڵکو بانکەکان لە ڕێگەی هەژماری منەوە، دەتوانن قەرز بە هاووڵاتیان بدەن، بۆ پرۆژە و بزنس و کڕینی خانوو و ئۆتۆمبێل.

هاوکات مەسرور بارزانی ئاماژەی بەوە کرد، ژێرخانێکی ئابووریمان بۆ هاووڵاتییان دروستکردووە، بۆ ئەوەی پشتیوانی دارایی و بانکی بۆ سەرجەم هاونیشتمانیان فەراهەم بکرێت.