ئەندازیارانی ژیریی دەستکرد بوونە کەسایەتیی ساڵی گۆڤاری تایم

ئاڤا نیوز
 
گۆڤاری تایمی ئەمریکی، ئەمساڵیش وەک نەریتێکی ساڵانەی خۆی، کەسایەتیی ساڵی بۆ ساڵی 2025 ڕاگەیاند. 

وێنە گەورەکە: کەسایەتیی ئەمساڵ لە ساڵانی پێشوو جیاوازە و لە بری کەسێکی ئاسایی، چەندین کەسی نادیار، بە بێ ئەوەی ناویان بهێنرێت، واتە ئەندازیارانی ژیریی دەستکرد بە کەسایەتی ساڵ دەستنیشان کراون.

زانیاریی زیاتر: وێنەی بەرگی یەکەمی گۆڤارەکە بە ئامێری کۆمپیوتەری نووسراوە "ئەی ئای" وەک ئاماژەی کورتکراوەی ژیریی دەستکرد. وێنەی بەرگی دووەمیشی وێنەی بەشێك لەو کەسانەیە کە ڕۆڵیان لە پێشخستنی ژیریی دەستکرددا هەبووە و تایم ناوی ناون (ئەندازیارانی ژیریی دەستکرد).

بڵاوکراوەی فەرمی: گۆڤارەکە سەبارەت بەم دەستنیشانکردنە نووسیویەتی "2025 ساڵی دەرکەوتنی تەواوەتیی تواناکانی ژیریی دەستکرد بوو، بە جۆرێک کە سەلمێنرا هیچ بوارێک بۆ گەڕانەوە بۆ دواوە نییە.

- لەبەر گوێزانەوە بەرەو سەردەمی ئەو ئامێرانەی کە بیر دەکەنەوە، لەبەر سەرسامی و نیگەرانییەکانی مرۆڤایەتی، لەبەر وەرچەرخانی ئێستا و تێپەڕاندنی مەحاڵ، ئەندازیارانی ژیریی دەستکرد کەسایەتی ساڵی 2025ـی تایمن."

زانیاریی زیاتر: ساڵی ڕابردوو، تایم دۆناڵد ترەمپی سەرۆکی ئەمریکای بە کەسایەتیی ساڵ دەستنیشان کردبوو.