قۆناغی سێیەمی پڕۆژەی ڕێگای گەشەپێدان دەست پێ دەکات

ئاڤا نیوز

وەزارەتی گواستنەوەی عێراق بەمزووانە قۆناغی سێیەمی پڕۆژەی گرنگی ڕێگای گەشەپێدان دەست پێ دەکات. ئەمە دوای ئەوە دێت کە دوو قۆناغی پێشووی پڕۆژەکە بە سەرکەوتوویی تەواو کران و بنەما سەرەکییەکانی پڕۆژەکە بە شێوەیەکی جیهانی دانران.

وێنە گەورەکە: ڕێگەى گەشەپێدان، پڕۆژەیەکی ئابووری، بازرگانی و گواستنەوەی نێودەوڵەتییە، وڵاتانی کەنداو بە تورکیا و پاشان بە ئەوروپا دەبەستێتەوە. لە بەندەری فاوەوە دەستپێدەکات، بە سنووری 11 پارێزگا تێدەپەڕێت و لە فیشخابوور کۆتایی دێت. درێژییەکەى 1200 کیلۆمەترە و تێچووەکەی 17 ملیار دۆلار دەبێت.

لێدوانی فەرمی: مەیسەم سافی، بەڕێوەبەری ڕاگەیاندنی وەزارەتی گواستنەوە بە ڕۆژنامەی فەرمی ڕایگەیاند، لە دوو قۆناغی ڕابردوودا، یاسا و ڕێساکانی پڕۆژەکە و شێوازی بەڕێوەبردنی کارەکان دیاریکراون. ئەمەش وایکردووە پڕۆژەکە ئامادەبێت بۆ قۆناغەکانی داهاتوو و ڕۆڵ و بەرپرسیارێتی لایەنەکان ڕوون بێت.

ئەوەی ئێستا ڕوودەدات: سافی ئاماژەی بەوەدا کە قۆناغی سێیەم تیشک دەخاتە سەر جێبەجێکردنی کرداری ئەو مەرج و ڕێککەوتنانەی لە گرێبەستەکاندا هەن. ئەمە دەتوانێت پشتگیریی تیمە ناوخۆییەکان بکات و چاودێریکردن و پابەندبوون باشتر بکات، هەروەها دڵنیایی بدات لەوەی لایەنە یاسایی و هونەری و داراییەکان بە شێوەیەکی باش پێکەوە کار دەکەن.

ئەوەی پێویستە بیزانیت: بە بڕوای مەیسەم سافی،  ڕێگای گەشەپێدان پڕۆژەیەکی ستراتیژی گەورەیە، چونکە ڕۆڵێکی سەرەکی دەبینێت لە بەهێزکردنی پەیوەندیی نێوان ناوچەکان، چالاککردنی بازرگانی و ئابووری و دروست کردنی دەرفەتی زۆری وەبەرهێنان و پەرەپێدان.

پلانەکە: لیژنەی باڵای پڕۆژەی ڕێگای گەشەپێدان ئێستا سەرقاڵی تاوتوێکردنی پلانەکانی کارکردنە کە لەلایەن کۆمپانیاکانی "ئۆلیڤەر وایمەن" و "بی تی بی" پێشکەش کراون. ئەمەش بۆ ئەوەیە باشترین پلان هەڵبژێردرێت، بەپێی ئاراستەی سەرۆکوەزیران کە داوای یەکلاییکردنەوەی بژاردەکان دەکات.

باکگراوند: لە نیسانی ساڵی 2024، عێراق، تورکیا، ئیمارات و قەتەر ڕێککەوتنێکی چوارقۆڵییان بۆ پڕۆژەی ڕێگای گەشەپێدانی عێراق، بە سەرپەرشتی محەممەد شیاع سوودانی، سەرۆکوەزیرانی عێراق و ڕەجەب تەیب ئەردۆغان، سەرۆککۆماری تورکیا، واژۆ کرد.

ڕۆژی 2025-12-4، محەممەد شیاع سوودانی، سەرۆکوەزیرانی عێراق لە بەسرە یەکەم قۆناغی ڕێگای گەشەپێدانی کردەوە، کە درێژییەکەی 62 کیلۆمەتر بوو.