ئاڤا خێزانێکی لێقەوماوی چەمچەماڵ بۆ هەتا هەتایە دڵخۆش دەکات

ئاڤا نیوز

خێزانێک لە ناحیەی شۆڕش، بژێوی ژیانیان لەسەر کۆکردنەی کارتۆن و پلاستیکە و دوو منداڵی ئەو خێزانە تووشبووی نەخۆشی تالاسیمان، ئاڤا مژدەیەکی خۆشیان پێدەدات و بۆ هەتا هەتایە دڵخۆشیان دەکات.

چیرۆکی سەرەکی: پیاوێکی تەمەن 70 ساڵ لە گەڕەکی باوەییەکان لە ناحیەی شۆڕش، خاوەنی سێ منداڵە و دوو لە منداڵەکانی تووشبووی نەخۆشی تالاسیمان، بەگوتەی خۆی داهاتی پێنج ڕۆژ کارکردنی تەنیا چوار هەزار دینارە

لێدوانی فەرمی: مام حوسێنی تەمەن 70 ساڵ قسەی دڵی بۆ دیار محەممەد، پەیامنێری ئاڤا کرد و وتی: "ئەگەر خێرخواز یارمەتیمان نەدەن هیچمان نیە، سێ بۆ چوار ڕۆژ خەریکی کۆکردنەوەی کارتۆن و پلاستیکم، ئینجا چوار هەزار دینارم دەست دەکەوێت.

مام حوسێن ئەمانەشی وت:

٠ لە ساڵی 2006 ـەوە لە شارەوانی خزمەت دەکەم، تا ئێستا خانەنیشین نەکراوم.

٠ سێ منداڵم هەیە، بەڵام دووانیان نەخۆشی تالاسیمایان هەیە، چاومان لە دەستی خێرخوازانە یارمەتیمان بدەن.

لەلایەکی دیکەوە: کچێکی ئەو خێزانە لێقەوماوە بەوپەڕی نائومێدییەوە بە ئاڤای وت: لە تەمەنی چوار بۆ نۆ مانگی تووشی نەخۆشی تالاسیما بووم، لە نۆ ساڵییەوە خوێنم تێدەکرێت. مانگانە لانی کەم پێویستم بە 100 هەزار دینارە تەنیا بۆ حەب و دەرمانەکانم.

وتیشی، ڕۆژانە هەر پارچەیەکی حەب بە سێ هەزار دەکڕم، پارەکەش خێرخواز دابینی دەکات، تەنیا داوا دەکەم باوکم خانەنیشینی بۆ بکرێت.

کاریگەریی ئاڤا: لە پەخشی راستەوخۆی ئاڤا، سەرمایەداری شاری هەولێر، حاجی ئیدریس سورچی بەڵێنیدا دەرمان و پێداویستی یەک ساڵ بۆ ئەو خێزانە دابین بکات و هەرچی پێداویستی دیکەیە بۆیان دابین بکات.

ئاڤا میدیا ئەو خێزانە لێقەوماوەی بانگهێشتی شاری هەولێری کرد و هەوراز گوڵپییان لە نزیکەوە بینی، بەڵێنیشیان پێدرا تەواوی داواکارییەکانیان بۆ جێبەجێ بکرێت، بە دڵخۆشی و پێکەنینەوە گەڕانەوە ناحیەی شۆڕش.