تاقیکردنەوەکانی کۆتایی وەرزی یەکەم دەست پێ دەکات

ئاڤا نیوز

سبەی دووشەممە تاقیکردنەوەکانی کۆتایی وەرزی یەکەم لەسەرجەم ناوەندەکانی خوێندنی هەرێمی کوردستان دەستپێدەکات و لە ڕۆژی 24-12-2025 کۆتایی پێدێت.

چیرۆکی سەرەکی: سبەی دووشەممە 15-12-2025 تاقیکردنەوەکانی کۆتایی وەرزی یەکەم لەسەرجەم ناوەندەکانی خوێندنی سەر بە وەزارەتی پەروەردەی حکومەتی هەرێمی کوردستان دەستپێدەکات، قوتابیانی بنەڕەتی و ئامادەیی و پیشەییەکان دەگرێتەوە، لەسەر 60 نمرە تاقیکردنەوەکان ئەنجام دەدرێن.

لێدوانی فەرمی: د. ئالان حەمەسەعید، وەزیری پەروەردە بە ئاڤای ڕاگەیاند، پرۆسەی تاقیکرنەوەکانی کۆتایی وەرزی یەکەم، لە ڕۆژی 15-12-2025 دەستپێدەکات و لە ڕۆژی 2025-12-24 کۆتایی پێدێت، تاقیکردنەوەکە هەموو قوتابیانی پۆلی چوارەم تاوەکو پۆلی دوانزە دەگرێتەوە.

زانیاریی زیاتر: لە ڕۆژی 25-12-2025 پشووەکانی خوێندن و سەری ساڵ لەناوەندەکانی خوێندن دەست پێدەکات، ڕۆژی 4-1-2026 دەوامی وەرزی دووەمی خوێندن دەستپێدەکاتەوە.

لەلایەکی دیکەوە: بەهۆی دروستبوونی لافاو لە چەمچەماڵ و بەرکەوتنی زیانێکی زۆر بە نێو ماڵەکان، بەڕەچاوکردنی بەرژەوەندی گشتیی مامۆستایان و قوتابیان و خانەوادەکانیان، وەزارەتی پەروەردە بەڕێوەبەرایەتی گشتیی پەروەردەی سلێمانی ڕاسپارد بە دواخستنی تاقیکردنەوەکانی وەرزی یەکەمی ناوەندەکانی خوێندنی سنووری قەزای چەمچەماڵ بۆ مانگی یەکی ساڵی 2026.