ڕکابەرەکەی ئەردۆغان نەخشەڕێگای خۆی بۆ چارەسەرکردنی پرسی کورد دەخاتەڕوو

ئاڤا نیوز

سەرۆکی دەستگیرکراوی شارەوانیی گەورەشاری ئیستانبووڵ و کاندیدی جەهەپە بۆ هەڵبژاردنی داهاتووی سەرۆکایەتیی کۆماری تورکیا، لە زیندانەوە پەیامێکی ڤیدیۆیی بۆ کۆنفرانسی ئاشتیی کۆمەڵایەتی و دیموکراسی نارد کە لەلایەن پارتەکەیەوە ڕێکخراوە، داوا دەکات دان بە ناسنامە، کولتوور و زمانی کوردیدا بنرێت و کوردانی پارچەکانی دیکە وەک هەڕەشە نەبینرێن بۆ سەر تورکیا.

پەیامی فەرمی: ئەکرەم ئیمامئۆغڵو دەڵێت، بۆ کۆتاییهێنان بە تووندوتیژی 40 ساڵە، دەبێت کێشەی کورد بە شێوەیەکی بوێرانە چارەسەر بکرێت. پێشنیاز دەکەم، هاووڵاتیبوونی یەکسان بکرێتە بنەما، بە مەرجی مانەوەی زمانی تورکی وەک تاکە زمانی فەرمی و زمانی خوێندن لە تورکیا، پێویستە ڕێگە بدرێت زمان، مێژوو و ئەدەبیاتی کوردی لە قوتابخانەکاندا بخوێنرێت.

لەلایەکی دیکەوە: سەبارەت بە پارچەکانی دیکەی کوردستان، ئیمامئۆغڵو ڕایگەیاند، دەبێت تورکیا دیدگای خۆی بگۆڕێت، کوردی عێراق و سووریا برامانن. دەبێت تورکیا بە جۆرێک بجوڵێتەوە کە کوردی هەولێر و سلێمانی و حەسەکە و عەفرین دڵنیابن لەوەی ئێمە باشی ئەوانمان دەوێت و پارێزەری مافەکانیان دەبین، نەک وەک هەڕەشە سەیریان بکەین.

زانیاریی زیاتر: ئیمامئۆغڵو پێشنیازی کرد شارەکانی ئامەد، وان، مێردین و ڕوها وەک شارەکانی ڕۆژئاوای تورکیا ببوژێنرێنەوە لە ڕووی ئابوورییەوە، دەبێت دەروازە سنوورییەکان بە ڕووی هەولێر، سلێمانی، حەسەکە، عەفرین و حەلەبدا بکرێنەوە تاوەکو بازرگانی گەشە بکات و خێروبێرەکەی بۆ هەمووان بێت. ئاشتیی ڕاستەقینە بە دابینکردنی دادپەروەری و خۆشگوزەرانی بۆ هەموو پێکهاتەکان بەدی دێت.

باکگراوند: ئەکرەم ئیمامئۆغڵو کە دوو جارە لەسەریەک بە پشتیوانی ڕاستەوخۆ و ناڕاستەوخۆی دەم پارتی بە سەرۆکی گەورەشارەوانیی ئیستانبوڵ هەڵدەبژیرێت، دوای ئەوەی ساڵی ڕابردوو ڕایگەیاند، خۆی بۆ هەڵبژاردنی داهاتووی سەرۆکایەتیی کۆماری تورکیا کاندید دەکات، بە تۆمەتی ساختەبوونی بڕوانامە و ئەنجامدانی گەندەڵی و بەرتیل وەرگرتن لە پۆستەکەی دوور خرایەوە و خرایە زیندان.