ئاڤای خەڵک؛ ڕووخانی پردی قەرەچەم هاتووچۆ لە گەرمیان پەکدەخات

ئاڤا نیوز

بەهۆی بارانبارینی زۆری ماوەکانی ڕابردوو، پردی قەرەچەم لەسەر ڕووباری سیروان ڕووخا و پەیوەندیی نێوان ناحیەی باوەنوور و چەند گوندێکی ناوچەکەی پەکخست؛ بەڕێوەبەرایەتیی ڕێگاوبانی گەرمیان ڕایدەگەیەنێت حکومەت ڕەزامەندیی لەسەر دروستکردنی پردێکی نوێ بە گوژمەی 12 ملیار دینار داوە.

چیرۆکی سەرەکی: پردی قەرەچەم کە ناحیەی باوەنوور و گوندی قەرەچەم بەیەک دەبەستێتەوە، بەهۆی لافاوەوە بەتەواوی لەکار کەوتووە، ئەمەش کێشەی بۆ بژێویی جووتیار و ئاژەڵدارانی ناوچەکە دروست کردووە. هاوکات زیاتر لە 20 قوتابیی گوندی قەرەچەم کە لە باوەنوور دەخوێنن، ماوەی مانگێکە بەهۆی داخرانی ڕێگاکەوە ناچارن لەم سەرمایەدا مەودایەکی زۆر بەپێ ببڕن تاوەکو دەگەنە قوتابخانەکانیان.

زانیاریی بەدەستهاتوو: عەلی مەحموود، ئەنجوومەنی گوندی قەرەچەم ڕایگەیاند: "ئێمە لەوبەری سیروانەوە خەریکی کشتوکاڵ و ئاژەڵدارین و بژێوی ژیانمان لەسەر ئەم کارانەیە، بەهۆی ڕووخانی پردەکە ناتوانین هاتوچۆ بکەین."

لێدوانی فەرمی: عەدنان خەلیل، بەڕێوەبەری گشتیی ڕێگاوبانی گەرمیان بە ئاڤای ڕاگەیاند: "پردێکی نوێ لەسەر ڕووباری سیروان لە گوندی قەرەچەم دروست دەکرێت، تەواوی ماستەرپلان و کارەکانی تەواو بوون و ڕەزامەندیی حکومەتیشی بۆ وەرگیراوە بە گوژمەی 12 ملیار دینار."

پڕۆژەی پردە نوێیەکە لە چوارچێوەی پڕۆژەی ڕێگای کەلار - سلێمانی جێبەجێ دەکرێت، بە درێژی 500 مەتر، پانی 13 مەتر و بەرزی 10 مەتر دروست دەکرێت. جگە لە پردەکە، تەواوی ڕێگاکە قیر دەکرێت و دەبەسترێتەوە بە ڕێگای دەروازەی تیلەکۆ.