ڕاوێژکاری سەرۆکوەزیرانی عێراق: ناجێگیریی بەهای دۆلار کاتییە

ئاڤا نیوز

ڕاوێژکاری دارایی سەرۆکوەزیرانی عێراق ڕایدەگەیێنێت، ناجێگیریی بەهای دۆلار کاتییە و پشت بە داتای ئابووریی ڕاستەقینە نابەستێت. هاوکات ئاماژە بەوە دەدات، حکومەت بەردەوامە لە جێگیرکردنی بەهای فەرمیی دراو لە 1,320 دینار بە پشتیوانیی یەدەگی بەهێز.

چیرۆکی سەرەکی: ماوەی چەند ڕۆژێکە بەهای دۆلار لە بازاڕەکانی عێراقدا ناجێگرییەکی بەخۆیەوە بینیوە، بە جۆرێک بەهای هەر 100 دۆلارێک گەیشتە سەرووی 143 هەزار دینار.

لێدوانی فەرمی: مەزهەر محەممەد ساڵح، ڕاوێژکاری دارایی سەرۆکوەزیرانی عێراق بە ئاژانسی فەرمی ڕاگەیاند، ئەوەی لە بازاڕی هاوتەریبی دراودا ڕوویداوە، تەنیا ناجێگیرییەکی کاتی و نائاساییە کە بەهۆی زانیاریی نادروست و دەنگۆوە دروست بووە، ئەمەش دەبێتە هۆی قازانجکردنی کورتخایەن لە بازاڕی دراوی نانازمدا.

ئەوەی ئێستا ڕوودەدات: بەگوتەی ساڵح، قۆناغەکانی گواستنەوە و دوای هەڵبژاردنەکان، لەگەڵ جێبەجێکردنی سیستەمی حوکمڕانیی گومرگ و ڕێکارە دیجیتاڵییەکان، دەبێتە هۆی جووڵانەوەی نرخەکان. ئەم گۆڕانکارییانە شەفافیەت و ڕێکخستن لە ژینگەی بازرگانی و داراییدا بەهێز دەکەن.

ئەوەی پێویستە بیزانیت: ڕاوێژکاری دارایی سەرۆکوەزیران ئاماژە بەوەدەدات، ناجێگیریی نرخی دۆلار لە بازاڕی هاوتەریبدا کاریگەرییەکی بنەڕەتی لەسەر ئاستی گشتیی نرخەکان نەبووە. سیاسەتی دراو بەردەوامە لە جێگیرکردنی نرخەکان و پاراستنی نرخی فەرمیی دراو، کە بووەتە هۆی کەمبوونەوەی گەشەی ساڵانەی هەڵاوسان بۆ ئاستی نزمتر لە 2.5%.

لەهەمان کاتدا: ساڵح گوتیشی: سیاسەتی جێگیربوونی نرخی دراو پشت بە یەدەگی بەهێزی دراوی بیانی دەبەستێت کە پشتیوانی لە جێگیربوونی نرخی فەرمیی دراو دەکات، کە 1,320 دینارە بۆ هەر دۆلارێک.