دیمەشق و هەسەدە لەسەر 60%ـی پرسەکان گەیشتوونەتە لێکتێگەیشتن

ئاڤا نیوز

هێزەکانی سووریای دیموکرات "هەسەدە" و حکومەتی دیمەشق گەیشتوونەتە لێکتێگەیشتنی بەرایی لەسەر زۆربەی پرسە سیاسیی و سەربازییەکان، کە تێیدا هەسەدە وەک سێ لیوای سەربازیی دەچێتە ناو سوپای سووریاوە.

زانیاریی تایبەت: بەپێی ئەو زانیارییانەی دەست ئاڤا میدیا کەوتوون، مەزڵووم عەبدی و ئەحمەد شەرع لەسەر 60%ـی کێشەکان ڕێککەوتوون. بەپێی نەخشەڕێگەکە، هەسەدە بە سێ لیوای سەربازیی تێکەڵی سوپای سووریا دەبێت؛ دوو لیوایان لە حەسەکە و لیوایەکیش لە کۆبانی جێگیر دەبن.

٠ هەروەها بڕیاردراوە سوپای سووریا لە دەوروبەری حەسەکە بکشێتەوە و شارۆچکەی شەدادی ببێتە دواین سنووری جێگیربوونی سوپا و گرووپە چەکدارەکان.

٠ لە ڕووی کارگێڕییەوە، دامەزراوەکانی ئیدارەی خۆسەر لەگەڵ فەرمانگەکانی حکومەت تێکەڵ دەکرێن و دەبنە یەک ئیدارەی هاوبەش، هاوكات هێزەکانی ئاسایشی ناوخۆی ڕۆژئاواش دەخرێنە سەر میلاکی وەزارەتی ناوخۆی سووریا.

٠ بڕیارە لە ڕۆژانی داهاتوودا کۆبوونەوەی لووتکە بۆ واژۆکردنی ئەم لێکتێگەیشتنانە ئەنجام بدرێت تاوەکو کۆتایی بە ململانێی چەکداریی بهێنرێت.

ژمارەکان وا دەڵێن: بە گوێرەی زانیارییەکان زیاتر لە 3,000 شەهید و کوژراو لە هەردوولا (600ـیان چەکداری دیمەشقن)، هاوکات تاوەکو ئێستا لەنێوان 2,000 بۆ 2,700 کەس چارەنووسیان نادیارە و بەگوێرەی گوتەی ڕێکخراوەکانی مافی مرۆڤ دەڵێن پتر لە 500,000 کەس ئاوارە بوون.

ئەوەی پێویستە بیزانیت: دۆخی مرۆیی لە کۆبانی گەیشتووەتە ئاستی کارەسات؛ بڕینی ئاو، کارەبا و ئینتەرنێت ژیانی 380,000 کەسی تووشی سەختییەکی یەکجار قورس کردووەتەوە. سەرەڕای پێشڕەوییە دیپلۆماسییەکان، بەڵام گەمارۆکە هێشتا وەک "کارتی فشار" دژی کورد بەکاردەهێنرێت و ڕێگریی لە گەیشتنی هاوکارییە مرۆییەکان دەکرێت، کە ئەمەش مەترسیی مردن بە برسێتیی و سەرما لە ناو شارەکەدا زیاتر کردووە.