تورکیا ناوبژیوانیی لە نێوان ئێران و ئەمریکادا دەکات

ئاڤا نیوز

سەرۆککۆماری تورکیا پێشنیازی کۆبوونەوەیەکی سێ قۆڵیی بە تەلەفۆن بۆ سەرۆکانی ئەمریکا و ئێران دەکات؛ ترەمپ ڕەزامەندیی نیشانداوە و ئەنقەرە چاوەڕێی وەڵامی تارانە تاوەکو ڕێگریی لە شەڕێکی گەورە بگرێت.

وێنە گەورەکە: تورکیا دەیەوێت لەرێگەی ئەم دەرفەتەوە مەترسیی هێرشی سەربازیی ئەمریکا بۆ سەر ئێران دوور بخاتەوە؛ سەرکەوتنی ئەم نێوەندگیرییە نەک تەنها ناوچەکە لە جەنگێکی وێرانکەر دەپارێزێت، بەڵکو پێگەی ئەنقەرە وەک تاقە "پردی پەیوەندیی" متمانەپێکراو لەنێوان واشنتن و تاراندا جێگیر دەکات.

لێدوانی فەرمی: هاکان فیدان، وەزیری دەرەوەی تورکیا ڕایگەیاند: بە هیچ شێوەیەک لەگەڵ هێرشی سەربازیی نیین بۆ سەر ئێران، چونکە مەترسیی بۆ هەموو جیهان هەیە؛ ئامادەین بۆ ناوبژیوانیی تاوەکو کێشەکان لەرێگەی دیپلۆماسییەوە چارەسەر بکرێن.

بڵاوکراوەی فەرمی: بەپێی ڕاپۆرتی ڕۆژنامەی "حوڕییەت"، ئەردۆغان پێشنیازی پەیوەندییەکی تەلەفۆنیی هاوبەشی بۆ هەردوو سەرۆک کردووە و ترەمپیش بێ دوودڵیی قبووڵی کردووە، بەڵام مەسعوود پزیشکیان تاوەکو ئێستا وەڵامی فەرمیی نەداوەتەوە.

لەلایەکی دیکەوە: محەممەد باقر قالیباف، سەرۆکی پەرلەمانی ئێران لە چاوپێکەوتنێکدا لەگەڵ CNN ڕایگەیاندووە کە ئەوان دەرگای دانوستانیان دانەخراوە، بەڵام ڕازیی نین بەو شێوازەی کە ئەمریکا دەیەوێت ئیرادەی خۆی بەسەریاندا بسەپێنێت. ئەنقەرە دەیەوێت لەرێگەی ئەم جووڵە چڕانەوە واشنتن قایل بکات کە دیپلۆماسییەت کەمتر تێچووی هەیە لە بژاردەی سەربازیی.

پەیوەست بەم بابەتەوە: بڕیارە سبەی هەینی عەباس عێراقچی، وەزیری دەرەوەی ئێران بگاتە ئەنقەرە تاوەکو وردەکاریی ئەم دەستپێشخەرییە و مەرجەکانی تاران تاوتوێ بکەن.