سەرجەم گەشتە ئاسمانییەکانی فڕۆکەخانەی نێودەوڵەتیی هەولێر دواخران

ئاڤا نیوز

بەڕێوەبەری فڕۆکەخانەی نێودەوڵەتیی هەولێر بە ئاڤای ڕاگەیاند، بەهۆی نالەباریی کەشوهەواوە سەرجەم گەشتە ئاسمانییەکانی فڕۆکەخانەی هەولێر دواخران و دەشڵێت: "لەگەڵ نوێنەری سەرجەم هێڵە ئاسمانییەکان لە کۆبوونەوەداین."

لێدوانی فەرمی: ئەحمەد هۆشیار، بەڕێوەبەری فڕۆکەخانەی نێودەوڵەتیی هەولێر بە ئاڤا میدیای ڕاگەیاند، لە کاتژمێر 9:30ـی ئەمشەو، بەهۆی کەمبوونەوەی مەودای بینین، سەرجەم گەشتەکانی فڕۆکەخانەی نێودەوڵەتیی هەولێر دواخران، ئەو هەنگاوەش بۆ سەلامەتیی گیانی گەشتیاران و هێڵە ئاسمانییەکان جێبەجێ کراوە.

زانیاریی زیاتر: بە گوتەی بەڕێوەبەری فڕۆکەخانەی نێودەوڵەتیی هەولێر، ئەمشەو هێڵی ئاسمانیی تورکش ئێرلاین دوو گەشتی هەبووە و هەردووکیان بۆ کاتژمێر 11ـی پێش نیوەڕۆی سبەی هەینی دواخران، ڕەنگە هەردوو گەشتەکە بکرێنە یەک گەشت و بە فڕۆکەیەکی گەورەتر لەوەی پێشتر دەستنیشان کرابوو، ئەنجام بدرێت.

لەلایەکی دیکەوە: گەشتەکانی هێڵی ئاسمانیی پێگاسۆس خرانە بەرەبەیانی سبەی، ئێستاش بە شێوەی ئۆنلاین لەگەڵ سەرجەم کۆمپانیاکانی هێڵی گواستنەوە لە کۆبوونەوەداین و دەمانەوێت گەشتەکانیان بۆ ڕێکبخەین.

ئەوەی پێویستە بیزانیت: هەرێمی کوردستان و تورکیا لە چەند ڕۆژی ڕابردوودا لەژێر کاریگەریی نزمەپاڵەپەستۆیەکی جەمسەرییدان؛ ئەم شەپۆلە بووەتە هۆی بارینی بەفر و دروستبوونی تەمومژی چڕ، کە لە هەندێک ناوچە ئاستی بینینی بۆ خوار 200 مەتر کەم کردووەتەوە، ئەمەش ڕاستەوخۆ مەترسیی لەسەر سەلامەتیی گەشتە ئاسمانییەکان دروست دەکات.