سوورەیا هەساری: دۆخی ژیان لە ڕۆژئاوای کوردستان ئاسایی بووەتەوە

ئاری عەبدوڵڵا

نێردراوی ئاڤا میدیا بۆ ڕۆژئاوای كوردستان ڕایدەگەیێنێت، ئەمڕۆ بەراورد بە ڕۆژانی ڕابردوو، دۆخی ناوچە کوردییەکان ئارامە و هیچ جۆرە گرژی و پێكدادانێک نەبووە و ژیان تاڕاددەیەكی زۆر ئاسایی بووەتەوە.

ئەوەی پێویستە بیزانیت: سورەیا هەساری، نێردراوی ئاڤا میدیا بۆ ڕۆژئاوای كوردستان، لە گەشتی دەنگوباسی کاتژمێر (حەوت) وتی، ئەمڕۆ دۆخەكە لە حەسەكە، قامیشلۆ، عاموودا و دەڤەرەكانی دیكەی ڕۆژئاوای كوردستان ئارامە، هیچ جۆرە شەڕ و گرژییەكی ئەوتۆ نەبووە و ژیانی هاووڵاتیان تاڕاددەیەكی زۆر، ئاسایی بووەتەوە.

ئەمەش بزانە: چوونی سورەیا هەساری، میدیاكاری ناسراوی ئاڤا میدیا بۆ ڕۆژئاڤا و هەڕەشەكانی نەیارانی كورد لە دژی، بووەتە ترێندی ڕۆژ و دەنگدانەوەی زۆری بەدوای خۆیدا هێناوە.

- سورەیا دەڵێت، "گەیاندنی دەنگی ڕاستی و حەقانیەت، سەخت و دژوارە، بۆیە بۆ خزمەتكردنی نەتەوەكەم و هاوزمانانم، گوێ بە هەڕەشە و مەترسییەكان نادەم."

- ئەو وەک میدیاكار تەنیا بەرگری لە مافەكانی مرۆڤ كردووە و ئەو دەستدرێژییانەی دەكرێتە سەر كورد لە ڕۆژئاوای كوردستان، بە ڕای گشتی گەیاندووە، ئەوەش ئەركێكی مرۆڤایەتییە بەر لەوەی ئەركێكی نیشتمانی بێت.

باكگراوند: لە ڕۆژی 18ـی ئەم مانگە ڕێككەوتن لەنێوان دیمەشق و هەسەدە لەسەر ئاگربەستی چوار ڕۆژی كرا، دواتر هەردوولا ڕێككەوتن لەسەر درێژكردنەوەی ئاگربەست بۆ ماوەی 15 ڕۆژ، ئەوەش لەپێناو گەیاندنی كۆمەک و هاوكاریی مرۆیی بە ئاوارەكان لەلایەک و گرتنەبەری ڕێككارەكانی گواستنەوەی داعشە دەستگیركراوەكان بەرەو زیندانەكانی عێراق لەلایەكی دیكەوە، لەو ماوەیەشدا هەسەدە هێزەكانی سەر بە دیمەشقی بەوە تۆمەتبار كرد كە چەندین جار پێشێلی ئاگربەستیان كردووە.