عێراق و تورکیا لەبارەی پرسی ئەمنیی کۆدەبنەوە

ئاڤا نیوز 

وەزیری دەرەوەی توركیا ڕایگەیاند، هەفتەی داهاتوو لیژنەی باڵای هاوبەشی عێراق و  توركیا كۆدەبنەوە.

وێنە گەورەکە: بۆ درێژەدان بە گفتوگۆ ئەمنییە هاوبەشەکانی نێوانیان هەینی داهاتوو، لیژنەی باڵای عێراق و تورکیا لە ئەنقەرە کۆدەبنەوە و وەزیری ناوخۆی هەرێمیش بەشدارە.

لێدوانی فەرمی: هاکان فیدان، وەزیری دەرەوەی تورکیا ڕایگەیاند: چوارەمین کۆبوونەوەی میکانیزمی ئەمنیی هاوبەشی نێوان تورکیا و عێراق هەفتەی داهاتوو لە ئەنقەرە بەڕێوەدەچێت.

زانیاریی زیاتر: وەزیرانی دەرەوە و بەرگریی و سەرۆکی دەزگای هەواڵگری و نوێنەرانی وەزارەتەکانی ناوخۆی هەردوو وڵات، بەشداری کۆبوونەوەکان دەکەن، جگە لە بەرپرسی دەستەی حەشدی شەعبی، جێگری بەڕێوەبەری دەزگای هەواڵگری و وەزیری ناوخۆ لە حکومەتی هەرێمی کوردستان.

ئەوەی پێویستە بیزانیت: لە 14ی ئازاردا تورکیا و عێراق پێکهێنانی لیژنەی هەمیشەیی هاوبەشیان لە بەغدا ڕاگەیاند، کە لە بوارەکانی بەرەنگاربوونەوەی تیرۆر، بازرگانی، کشتوکاڵ، وزە، ئاو، تەندروستی، و گواستنەوە کاردەکەن.