لەبەغدا لەسەر ڕووبەری هەشت دۆنم زەوی ماددەی هۆشبەر دەچێنرێت

ئاڤا نیوز 

لە قەزای مەدائین لە بەغدای پایتەختی عێراق، دەستبەسەر كێڵگەیەكی هەشت دۆنمیدا گیرا  کە ماددەی هۆشبەری تێدا چێنرابوو.

وێنە گەورەکە: عێراق بووەتە شوێنی بەرهەمهێنانی ماددە هۆشبەرەکان و چەندین تۆڕی نێوخۆیی و نێودەوڵەتی کاری کڕین و فرۆشتن بەو ماددانەوە دەکەن.

لێدوانی فەرمی: ئەرشەد حاکم، گوتەبێژی دەستەی ئاسایشی نیشتیمانی عێراق ڕایگەیاند: لە ناوچەی ئەللاج لە قەزای مەدائین لە بەغدا، ڕووەکی داتوورا دۆزراوەتەوە كە لەسەر ڕووبەری هەشت دۆنم چێنرابوو و دەستی بەسەردا گیرا و بەپێی ڕاپۆرتی دادگە لەناوبرا.  

ئەوەی پێیویستە بیزانیت: ئەم ڕووەکە وەک دەرمان لە عێراق بەکاردێت و ناوەکەی داتورەیە و پڕە لە دانەوێڵەی ماددە هۆشبەرەکان.

باکگراوند: لە هەشت مانگی ئەمساڵدا وەزارەتی ناوخۆی عێراق 140 سزای لەسێدارەدان و 500 سزای هەتاهەتایی بۆ بازرگانانی ماددە هۆشبەرەکان دەرکردووە.