لە هەولێر کۆمەڵگەیەکی هاوچەرخی پەروەردەیی مۆدێرنی حکومی دەکرێتەوە

ئاڤا نوز

 

بۆ یەکەمینجار لەسەر ئاستی عێراق و کوردستان کۆمەڵگەی هاوچەرخی بارزانی نەمر، بە کۆمەڵێک تایبەتمەندییەوە دەکرێتەوە، خوێندن تێیدا لە باخچەی ساوایان دەستپێدەکات تاوەکو پۆلی 12ی ئامادەیی.

 

وێنە گەورەکە: کۆمەڵگەی هاوچەرخی بارزانی نەمر لەسەر بودجەی حکومەتی هەرێمی کوردستان دروستکراوە، نزیکەی هەزار قوتابی لە ڕێگەی هەڵسەنگاندنی پێشوەختە وەردەگرێت.

 

زانیاریی تایبەت: سەرچاوەیەک لە وەزارەتی پەروەردەی حکومەتی هەرێمی کوردستان بە ئاڤا نیوزی گوت، "لە ئایندەیەکی نزیک کۆمەڵگەکە لەلایەن سەرۆکوەزیران مەسرور بارزانی دەکرێتەوە، سیستمی خوێندنی ئەو کۆمەڵگەیە بەزمانەکانی ئینگلیزی و کوردی دەبێت، سیستمی ئینگلیزی لە باخچەی ساوایان تاوەکو پۆلی 12 بەجیا دەخوێنرێت."

 

زانیاریی زیاتر: لەم کۆمەڵگەیە، وانەکانی مۆسیقا، شانۆ و وەرزش بەجیا دەخوێندرێن، قوتابیان ڕۆژانە شەش کاتژمێر و نیو دەوام دەکەن.

 

ئەوەش بزانە: کۆمەڵگەکە لە چوار تاقیگەی پێشکەوتوو، کتێبخانە کە چوار هەزار  سەرچاوەی کتێب لەخۆدەگرێت، دوو مەلەوانگە بۆ  کوڕان و کچان بە جیا، دوو یاریگەی وەرزشی  کافتریا، پارک، هۆڵی سیمینار، هۆڵی شانۆ، هۆڵی سینەما و مۆسیقا لەخۆدەگرێت.