گەنە ڤایرۆسێکی نوێ بڵاودەکاتەوە

ئاڤا نیوز

زیندەوەری گەنە کە بە هۆکاری نەخۆشی لایم ناسراوە، ئێستا بووەتە هۆی بڵاوبوونەوەی ڤایرۆسێکی نوێ، ڤایرۆسەکەش لەگەڵ گەرمبوونی زەوی زیاتر بڵاودەبێتەوە.

چیرۆکی سەرەکی: ‏دەزگای میدیایی (WABE) ئەمریکی ڕاپۆرتێکی لەبارەی بڵاوبوونەوەی ڤایرۆسی (هێرتلاند - heartland) بڵاوکردووەتەوە، بابەتەکە لە زانکۆی ئیمۆری لە ویلایەتی جۆرجیا لێکۆڵینەوەی لەسەر دەکرێت.

ئەوەی پێویستە بیزانیت: ڤایرۆسەکە لەڕێگەی جۆرە مشەخۆرێکەوە بڵاودەبێتەوە کە پێی دەگوترێت گەنەی ئەستێرەیی کە لە ویلایەتی جۆرجیا زۆرە. ئەوەی ڕوونە "heartland" نیشانەی تاڕادەیەک ئاسایی هەیە، لەوانە تا، ماندووبوون، دڵەڕاوکێ و سکچوون.

لێدوانی فەرمی: توێژەر ئارابێلا لویس لە زانکۆی ئیمۆری دەڵێت: "کێشەکە ئەوەیە ڤایرۆسەکە ئێستا هیچ چارەسەرێکی نییە، لەم قۆناغەدا هیچ چارەسەرێک نییە جگە لە گرنگیدان بە نیشانەکان."

زانیاریی زیاتر: هەرچەندە ڤایرۆسەکە تاڕادەیەک دەگمەنە، بەڵام سەنتەری کۆنترۆڵکردن و پێشگیریکردن لە نەخۆشییەکان مردنی چەندین تووشبووی تۆمار کردووە.

لەلایەکی دیکەوە: گۆنزالۆ ڤازکێز پرۆکۆپیک، توێژەری سەرەکی لێکۆڵینەوەکە دەڵێت: "بەبێ چارەسەر یان ڤاکسین، بەدواداچوونی شێوازەکانی نەخۆشییە بڵاوبووەوەکان زۆر گرنگ دەبێت. ئێمە هەنگاوی پێویست دەگرینە بەر بۆ تێگەیشتن لەمە، دەبێت بزانین ئەگەر  ژمارەی تووشبووان لە مرۆڤ زیادی کرد چی بکەین."

ئەمەش بزانە: گەنە یان زچ یاخود لچ (بە ئینگلیزی: Tick) زیندەوەرێکی مشەخۆری کۆمەڵەی بێ بڕبڕەکانە و مێروو نییە، بەڵکو زیاتر لە پۆلی مێشوولەکانە.