مەسرور بارزانی گەورەترین پڕۆژەی ئاژەڵداری و شیرەمەنی لە دهۆک کردەوە

ئاڤا نیوز

 

سەرۆکوەزیران مەسرور بارزانی لەکاتی کردنەوەی پڕۆژەیەکی گەورەی ئاژەڵداری لە دهۆک ڕایگەیاند، پلانیان هەیە گرنگییەکی زۆر بە کەرتی پیشەسازی بدەن، ئەمەش دوو سوودی دەبێت، هەم هەلی کاری زیاتر دەڕەخسێنێت، هەم کوردستان دەباتە قۆناغێکی نوێوە و ئاسایشی خۆراک بەرقەرار دەبێت.

 

چیرۆکی سەرەکی: سەرۆکوەزیران مەسرور بارزانی لە دهۆک پڕۆژەی کاڤین فارمی کردەوە، کە گه‌وره‌ترین پڕۆژه‌ی ئاژه‌ڵداری و شیره‌مه‌نییە له‌سه‌ر ئاستی عێراق و هه‌رێمی كوردستان. پڕۆژەکە بە گوژمەی 90 ملیۆن دۆلار جێبەجێ کراوە و توانای بەرهەمهێنانی 120 هەزار لیتر شیری هەیە لە ڕۆژێکدا.

 

لێدوانی فەرمی: سەرۆکوەزیران مەسرور بارزانی لە مەراسیمەکەدا گوتارێکی پێشکەش کرد و ڕایگەیاند: کردنەوەی ئەو پرۆژە ستراتیژییە کاریگەرییەکی باشی لەسەر ئابووریی هەرێمی کوردستان دەبێت و بە سەدان دەرفەتی کاری ڕەخساندووە. بەرنامەی حکومەتی ئێمە بۆ هەمەچەشنکردنی یان هەمەجۆرکردنی ئابووری بۆ ئەوەیە، پابەند نەبین بە جۆرێکی داهات.

 

بابەتە ستراتیژییەکان: سەرۆکوەزیران مەسرور بارزانی جەختی لەوە کردەوە "کاتێک کەرتی کشتوکاڵ پێش دەکەوێت، ئاسایشی خۆراک لەسەر ئاستی هەموو کوردستان پارێزراو دەبێت و خەڵک ناچار نابێت پشت بە بەرهەمی دەرەکی ببەستێت، یانیش ئەگەر خوانەکا تووشی قەیرانێک ببین بابەتی خۆراک و ئاسایشی خۆراک بۆ ئێمە ببێتە کێشە. پاراستنی ئاسایشی خۆراک بۆ هەر وڵات و نەتەوەیەک شتێکی زۆر پێویستە، خۆشحاڵم کە دەبینم لە کوردستان بەرەو ئەو ئامانجە هەنگاو دەنێین".

 

گۆشەیەکی دیکە: مەسرور بارزانی پلانی داهاتووی حکومەتی ئاشکراکرد کە گرنگییەکی زۆر بە کەرتی پیشەسازی دەدەن، گوتیشی: "هەوڵمان داوە هەرێمی کوردستان لەگەڵ دەرەوە گرێبدەین و هاوکات بەرهەمی ناوخۆیی و دەرەوە ڕێکبخەین و ناچار نەبین هەموو کات بەرهەمی دەرەوە هاوردە بکەین".