ڕێبوار تەها: بەهیچ شێوەیەک من ناچم بۆ بەغدا

ئاڤا نیوز

سەرەڕای ئەوەی لەسەر ئاستی هەموو عێراق زۆرترین دەنگی بەدەستهێناوە، ڕێبوار تەها لە کۆنگرەیەکی ڕۆژنامەوانیدا ڕایگەیاند: دڵنیایی دەدەم بە هەموو لایەک کە لە کەرکووک دەمێنمەوە و ناچم بۆ بە‌غدا. 

چیرۆکی سەرەکی: ڕۆژی سێشەممە، دەنگدانی گشتی لە سەرانسەری عێراق بۆ پەرلەمانی عێراق بەڕێوەچوو، تێیدا زیاتر لە 20 ملیۆن کەس مافی دەنگدانی هەبوو، دواتر ئێوارەی ڕۆژی چوارشەممە کۆمیسیۆنی باڵای سەربەخۆی هەڵبژاردنەکانی عێراق ڕایگەیاند ڕێژەی بەشداری 54.35% بووە، دواتر هەر لەگەڵ ڕاگەیاندنی ئەنجامەکان دەرکەوت ڕێبوار تەها خاوەنی زۆرترین دەنگە لە سەر ئاستی هەموو کاندیدەکانی دیکە بە بەدەستهێنانی 96 هەزار دەنگ. 


لێدوانی فەرمی: ڕێبوار تەها، پارێزگاری کەرکووک و کاندیدی یەکێتی نیشتمانی کوردستان بۆ پەرلەمانی عێراق لە کۆنگرەیەکی ڕۆژنامەوانیدا ڕایگەیاند: بەهیچ شێوەیەک من ناچم بۆ بەغدا، ئەرکی من لەگەڵ هاوڕێیانم ئەوە بوو لیستی یەکێتی بکەین بە یەکەمی کەرکووک، سوپاس بۆ خوا ئەوەمان بەدەستهێنا. 

هەر لە کۆنگرە ڕۆژنامەوانییەکەدا باسی لەوەشکرد: دڵنیایی بە خەڵکی کەرکووک دەدەم کە من ناچم بۆ پەرلەمان و لە کەرکووک دەمێنەوە و خزمەتی هاووڵاتییانمان دەکەین، جیاواز لە ساڵی ڕابردوو ئەمساڵ جیاوازتر خزمەت دەکەین.


ئەمەش بزانە: بەپێی ڕیزبەندی بەدەستهێنانی زۆرترین دەنگ لە لیستی یەکێتی نیشتیمانی کوردستان لە بازنەی کەرکووک، هەڵۆ جەباری لەدوای کاندیدە دەرچووەکان زۆرترین دەنگی بەدەستهێناوە کە پێنج هەزار و 847 دەنگە، بەوپێیەش بێت ئەو شانسەی بەردەکەوێت کە بچێتە پەرلەمانی عێراق.


لەلایەکی دیکەوە: بەهۆی ئەوەی بەشێک لە هێزە کوردییەکان لە کەرکووک دەنگی پێویستیان نەهێنا بۆ بەدەستهێنانی کورسی، کورد لە کەرکووک بەراورد بە هەڵبژاردنی ساڵی 2021، چەند کورسییەکی لەو پارێزگایە لەدەستداوە و دابەزیوە بۆ پێنج کورسی پەرلەمانی.