چەند زانیارییەک دەربارەی ئەو شوێنەی ئەمڕۆ لە ئەنقەرە هێرشی کرایە سەر

ئاڤا نیوز

 

دوانیوەڕۆی ئەمڕۆ بە تەقینەوە و دەستڕێژیی گولـلە هێرش کرایە سەر یەکێک لە گرنگترین ژێرخانی ئابووری تورکیا کە ئەویش کۆمپانیای پیشەسازیی فڕۆکەوانی تورکیا بوو.

 

چیرۆکی سەرەکی:  دوای هێرشەکەی سەر ئەو کۆمپانیایە، میدیاکانی تورکیا ئەوەیان بڵاوکردەوە، هێرشەکە خۆکوژیی بووە و بەشێکی دیکەشیان ئەوەیان بڵاوکردەوە دەنگی تەقینەوەیەکی بەهێز لە شوێنەکە بیستراوە؛ هاوکات وەک لە یەکێک لە ڤیدیۆکاندا دەرکەوت یەکێک لە چەکدارەکان ژن بووە.

 

لەلایەکی دیکەوە: دوای چەند کاتژمێرێکیش ئەوە بڵاو کرایەوە لە هێرشەکەدا چوار کەس کوژراون و چواردە کەسی دیکەش بریندار بوون.

بۆچی گرنگە: کۆمپانیای پیشەسازیی فڕۆکەوانی تورکیا بە (توساش)ـیش ناو دەبرێت کە  پێکدێیت لە سەنتەری دیزاینکردن، توێژینەوە، پەرەسەندن، نوێگەرایی و خزمەتگوزاری. دوای فرۆشتنی سیستمی فڕۆکەوانیی لە تورکیا لە ساڵی 1973، کۆمپانیاکە چووە ژێر سێبەری وەزارەتی پیشەسازیی و تەکنۆلۆجیای وڵاتەکەی، ئەمەش بە ئامانجی کەمکردنەوەی وابەستەبوونی تورکیا بە وڵاتانی دیکە لە بەرگریکردن لە خۆی. 

 

زانیاریی زیاتر: داهاتی کۆمپانیاکە لە ساڵی 2019: 2.26 ملیار دۆلار بوو، هەروەها ژمارەی فەرمانبەرانی لە ساڵی 2024دا بە 17 هەزار کەس دەخەمڵێنران.

بابەتە سترایژییەکان: ئەو کۆمپانیایە هەڵدەستێت کاری دیزایین، بەمۆدێرنەکردن و بەرهەمهێنانی فڕۆکەی مەدەنی، فڕۆکەی جەنگیی، فڕۆکەی بێفڕۆکەوان، هێلیکۆپتەر و سیستەمەکانی تایبەت بە بۆشایی ئاسمان.

 

گۆشەیەکی دیکەی دیمەکەنە: بەرهەمەکانی ئەو کۆمپانیایە پێکدێن لە دروستکردنی چوار جۆری جیاوازی  فڕۆکەی جەنگیی، شەش جۆری جیاوازی هێلیکۆپتەری جەنگی، 13 جۆری جیاوازی فڕۆکەی بێفڕۆکەوان و چواری جۆری جیاوازی مانگی دەستکرد. 

 

پێدراوە ڕاستییەکان: لە گرنگترین کارەکانی ئەو کۆمپانیایە بریتین لە:
 
- لە نێوان ساڵانی 1993 بۆ 1995 کۆمپانیای توساش بە ڕەزامەندیی ئەمریکا 46 فڕۆکەی جەنگی جۆری F-16 بۆ هێزە ئاسمانییەکانی سوپای وڵاتی میسر درووستکردووە.
 
 گۆڕانکاریکردن لە هەلیکۆپتەری جۆری بلاک هاوکی ئەمریکی بۆ هێزە ئاسمانییەکانی وڵاتی تورکیا. 
•    بەهێزکردنی 41 فڕۆکەی جەنگی F-16 بۆ سوپای پاکستان.  
•    بەهێزکردن و پەرەسەندنی هەلیکۆپتەری جۆری یۆرۆکۆپتەر AS352 . 
•    دیزاینکردن، پەرەسەندن و بەرهەمهێنانی فڕۆکەی جەنگی بە ناوی ‌(هورجەت – HURJET). 
•    دیزاینکردن، پەرەسەندن و بەرهەمهێنانی فڕۆکەی بێفڕۆکەوانی جۆری ئانکا بۆ هێزە ئاسمانییەکانی سوپای وڵاتی تورکیا.