ئێران کوژرانی دوو سەربازی بەهۆی هێرشەکەی ئیسرائیل ڕاگەیاند

ئاڤا نیوز

 

کۆماری ئیسلامی ئێران کوژرانی دوو سەربازی وڵاتەکەی لە هێرشەکانی بەرەبەیانی ئەمشەوی ئیسرائیل ڕاگەیاند.

 

وێنە گەورەکە: بەرەبەیانی ئەمڕۆ شەممە 2024/10/26 ئیسرائیل بە دوو قۆناغ هێرشی ئاسمانی کردە سەر چەند بنکەیەکی سەربازیی ئێران لە پارێزگاکانی تاران و ئیلام و خۆزستان، وەک وەڵامێک بۆ هێرشە مووشەکییەکەی تاران بۆ سەر ئیسرائیل لە مانگی ڕابردوودا.

 

بەیاننامەی فەرمی: سوپای ئێران لە بەیاننامەیەکدا کوژرانی دوو سەربازەکەی ڕاگەیاند و ئاشکرای کرد، لە کاتی بەرپەرچدانەوەی مووشەکەکانی ئیسرائیل کوژراون.

 

لەلایەکی دیکەوە: لەبارەی قەبارەی زیانەکانی هێرشە مووشەکییەکەی ئیسرائیل، ئێران ئاماژە بۆ ئەوە دەکات، "هێرشەکان زیانی سنوورداریان هەبووە و کراونەتە سەر چەند پێگەی سەربازیی". 

بۆچوونی لایەنی بەرامبەر: ئیسرائیل دەڵێت، هێرشەکانی لە تۆڵەی هێرشە مووشەکییەکەی ڕۆژی یەکی ئۆکتۆبەری ئێران بووە.

 

ئەمەش بزانە: بەگوێرەی پێگەی ئەکسیۆسی ئەمریکی، ئیسرائیل ڕۆژێک بەر لە هێرشەکە لەڕێگەی وەزیری دەرەوەی هۆڵەنداوە ئێرانی لە ساتی ئەنجامدانی هێرشەکە ئاگادار کردووەتەوە.