لە هەولێر  20 ئۆتۆمبێل بەهۆی دەردانی دووکەڵی پیسەوە سزادراون

ئاڤا نیوز

 

بەڕێوەبەرایەتی ژینگەی هەولێر ڕێکاری یاسایی بەرامبەر ئەو ئۆتۆمبێلانە دەگرێتەبەر، کە دووکەڵی زۆریان هەیە و دەبنە هۆی پیسبوونی ژینگە.

 

وێنە گەورەکە: بەمەبەستی پاککردنەوەی ژینگەی شارەکە بەڕێوەبەرایەتی ژینگەی هەولێر ماوەیەکە ڕێککاری یاسایی بەرامبەر ئەو ئۆتۆمبێلانە دەگرێتە بەر کە دووکەڵی پیس دەردەدەن و ژینگە پیس دەکەن. 

 

لێدوانی فەرمی: دڵشاد هیرانی، بەڕێوەبەری گشتیی ژینگەی هەولێر، بە ئاڤا نیوزی ڕاگەیاند: ئەمڕۆ 20 ئۆتۆمبێل کە دووکەڵی زۆریان دەکرد، بە نووسراوەوە ئاڕاستەی بەڕێوەبەرایەتی هاتووچۆی هەولێر کران، بۆ ئەوەی ڕێکاری یاساییان بەرامبەر بگیرێتەبەر و سزا بدرێن.

 

بەڕێوەبەری گشتیی ژینگەی هەولێر، دەڵێت: هاونیشتمانیان هاوکارمانن و ڤیدۆ و وێنە لە ڕێی پەیجەکەمانەوە دەنێرن، دوای ئەوەی ژمارەی ئۆتۆمبێلەکان دەگەنە 15 ئۆتۆمبێل ئاڕاستەی بەڕێوەبەرایەتی هاتووچۆی دەکەین.

 

زانیاری زیاتر: بە گوتەی هیرانی لە مانگی هەشت تاوەکوو ئێستا زیاتر لە 40 ئۆتۆمبێل بەهۆی دووکەڵی زۆرەوە سزادراون و زۆرینەی ئۆتۆمبێلەکانیش لە جۆری 'کیا'ن. 

 

بۆچی گرنگە: ئەمە هەنگاوێکە بۆ کەمکردنەوەی دووکەڵە زیانبەخشەکانی ئۆتۆمبێل و کاریگەریەکانی لەسەر ژینگەی شاری هەولێر.