دوایین زانیاریی سەبارەت بە ناردنی یەکەم گوژمەی پارەی مووچەی مانگی 10

ئاڤا نیوز 

 

شاندێکی تەکنیکی وەزارەتی دارایی و ئابووریی هەرێمی کوردستان لە بەغدایە، ڕوونکردنەوەیان سەبارەت بە لیستی مووچەی مانگی 10ـی مووچەخۆرانی هەرێمی کوردستان بە وەزارەتی دارایی حکومەتی فیدراڵی داوە، ئەمڕۆ یان یەکشەممە گوژمەی یەکەمی پارەکە دەگات.

 

وێنە گەورەکە: بەهۆی نەمانی پارەی نەختینە لە پشکی مووچە لە بودجە، تاوەکو ئێستا وەزارەتی دارایی عێراق هیچ گوژمەیەکی وەک پارەی مووچەی مووچەخۆران نەناردووە، بەگوتەی بەرپرسێکی باڵای هەرێمی کوردستان هیچ گرفتێک لەبەردەم ناردنی پارەکە نەماوە، بڕیارە زیاتر لە 500 ملیار وەک گوژمەی یەکەمی پارەکە بگات.

 

لێدوانی فەرمی: د.خەلیل دۆسکی، ئەندامی لیژنەی دارایی پەرلەمانی عێراق بە ئاڤا نیوزی گوت، "ئەگەر ئەمڕۆ تاوەکو ئێوارە وەزیری دارایی عێراق بڕیاری خەرجکردنی پارە بۆ هەرێمی کوردستان نەدات، بە ئەگەری زۆرەوە دەکەوێتە ڕۆژی یەکشەممەی داهاتوو". 

 

زانیاریی زیاتر: حکومەتی هەرێمی کوردستان بۆ مووچەی ئەم مانگە پێویستی بە 996 ملیار دینارە، بڕیارە لە هەفتەی داهاتوو گوژمەی دووەم و سێیەمی پارەکەش بنێردرێت.