ئاڤا وادەی ناردنی مووچەی مانگی 10 ئاشکرا دەکات

ئاڤا نیوز

ئاڤا میدیا زانیویەتی ناوەڕاستی هەفتەی داهاتوو بەغدا بڕی 700 ملیار دینار بۆ مووچەی مانگی 10 خەرج دەکات، سەرچاوەیەکیش لە بانکی ناوەندی دەڵێت پارەی پێویست لەبەردەتسە.

وێنە گەورەکە: محەممەد شیاع سوودانی، سەرۆکوەزیرانی عێراق و تەیف سامی، وەزیری دارایی عێراق واژۆیان لەسەر چارەسەرکردنی کێشەکان و خەرجکردنی مووچەی مانگەکانی 10 و 11 و 12 کردووە و بڕیارە هەفتەی داهاتوو مووچەی مانگی 10 خەرج بکرێت. 

لێدوانی فەرمی: سەرچاوەیەک لە وەزارەتی دارایی و ئابووریی هەرێمی کوردستان بە ئاڤا میدیای ڕاگەیاند، بڕیارە ڕۆژی سێشەممە یان چوارشەممەی هەفتەی داهاتوو کە دەکاتە 26 و 27ی مانگ، وەزارەتی دارایی عێراق بڕی 700 ملیار دینار بۆ مووچەی مانگی 10 خەرج بکات. 

زانیاریی زیاتر: بە وتەی سەرچاوەکەی ئاڤا، ڕەنگە بەغدا هەر ئەو 700 ملیار دینارە بۆ مووچەی مانگی 10 بنێرێت و بڵێت ئەوی تر بە داهاتی ناوخۆ پڕبکەنەوە. حکومەتی هەرێمی کوردستان بۆ مووچەی مانگی 10 پێویستی بە نزیکەی تریلۆنێک دینارە و ئەگەر بەغدا هەر 700 ملیارەکە بنێرێت، 300 ملیار دینار کورتهێنان دروست دەبێت.

حکومەتی عێراق داوای 50%ی داهاتی ناوخۆی هەرێمی کوردستان دەکات، هەرێمی کوردستانیش لە مانگی دوو بۆ مانگی شەش داهاتی ناردووە، بەڵام داهاتی مانگەکانی حەوت و هەشت و نۆ و دە تاوەکو ئێستا نەنێردراوە.

لەلایەکی دیکەوە: ئاڤا لە ڕێگەی بانکی ناوەندیی عێراقەوە سۆراغی مووچەی پرسی، سەرچاوەیەک وتی: "پارەی پێویست لەبەردەستە و هەر کاتێک بڕیاری خەرجکردنمان پێگەیشت، ڕاستەوخۆ دەیخەینە سەر هەژماری بانکی هەرێمی کوردستان".

ئەمەش بزانە: وەزارەتی دارایی و ئابووریی هەرێمی کوردستان هەفتەیەکە دەستی بە ئامادەکردنی لیستی مووچەی مانگی 11 کردووە، ئاڤا زانیویەتی هەفتەی داهاتوو لیستەکە بۆ بەغدا دەنێرێت، بۆ ئەوەی بەڕێوەبەرایەتی ژمێرکاریی وەزارەتی دارایی عێراق دەست بکات بە وردبینیکردن لێی.