دوای کارابوونەوەی پەرلەمانی کوردستان سەدان زیندانی ئازاد دەکرێن

ئاڤا نیوز

 

پڕۆژەیەک بۆ لێبووردنی گشتی لە زیندانیان ئامادەکراوە و سەدان زیندانی دەگرێتەوە. لەسەر کاراکردنەوەی پەرلەمانی کوردستان وەستاوە، پەرلەمان کارا بکرێتەوە یەکسەر پێشکەش دەکرێت.

 

وێنە گەورەکە: دۆخی زیندانەکانی هەرێمی کوردستان خراپە و زۆربەیان پڕبوونە، ئەمڕۆ بۆ یەکەمجار ژمارەی زیندانیان لە چاکسازییەکانی هەرێمی کوردستان گەیشتە شەش هەزار کەس.

 

چاکسازیی گەورانی هەولێر دوو هەزار و 250 کەس، لە سلێمانی هەزار و 710 کەس، دهۆک هەزار و 425 کەس، تەنانەت ژمارەی زیندانیان لە هۆڵەکان گەیشتووەتە 40 کەس.

 

لێدوانی فەرمی: ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان پڕۆژەکەی ئامادەکردووە، بە ئاڤای ڕاگەیاند: لەمە زیاتر ناتوانین زیندانی وەربگرین بەتایبەت لە هەولێر، بۆیە لەگەڵ کارابوونەوەی پەرلەمان لە هەفتەی یەکەم و دووەم پڕۆژەکە پێشکەش دەکەین.

 

لێبووردنی گشتی تەنها 10 جۆری سزا ناگرێتەوە، بۆنموونە: تیرۆر، بازرگانیکردن بە ماددەی هۆشبەر، کوشتن ئاشتەوایی نەکرابێت، دەستدرێژی و چەند جۆرێکی تریش.

 

لەلایەکی دیکەوە: لێبوردنی تایبەت لە کوردستان بەردەوامە، ئەو زیندانیانە دەگرێتەوە نەخۆشی قورس و درێژخایەنیان هەیە، بەتەواوی پەکیان کەوتووە و هیچ چارەسەرێکیان نییە، ئامانجی ئازادکردنیشیان ئەوەیە ئەو تەمەنەی ماویانە لەنێو کەسوکاریان بەسەری ببەن.

 

تەنانەت 15 ڕۆژ پێش ئێستا پێنج زیندانی ئازاد کراون، چوار لە دهۆک و یەک لە هەولێر، ئەوانەی دهۆک عەرەب بوون و هەموویان بە ماددەی تیرۆر حکوم بوون.