سوودانی بە دوو بیانوو بڕیاری خەرجکردنی مووچەی مانگی هەشتی نەدا

ئاڤا نیوز

محەممەد شیاع سوودانی لە کۆبوونەوەی ئەمڕۆی ئەنجوومەنی وەزیرانی عێراق بڕیاری خەرجکردنی مووچەی خەڵکی کوردستان نەدا و کەوتە هەفتەی داهاتوو. وەزیرێکی بەشدار لە کۆبوونەوەکەش بۆ  دوو هۆکاری دەگەڕێنێتەوە.

چیرۆکی سەرەکی؛ محەممەد شیاع سوودانی، سەرۆکوەزیرانی عێراق هەفتەی ڕابردوو لە کۆبوونەوەی لەگەڵ وەزیرانی کورد بەڵێنی خەرجکردنی مانگی هەشتی مووچەی خەڵکی کوردستانی دابوو، بەڵام ئەم هەفتەیە لە کۆبوونەوەی ئەنجوومەنی وەزیرانی عێراق بەڵێنەکەی نەبردە سەر و بڕیاری خەرجکردنی مووچەی نەدا.

لە کۆبوونەوەی ئەمڕۆ تەیف سامی، وەزیری دارایی عێراق و چەند وەزیرێکی دیکە بەشدار نەبوون، لەوانە: دوو وەزیری کورد، د.فوئاد حوسێن، وەزیری دەرەوە و د.هەڵۆ عەسکەری، وەزیری ژینگەی عێراق.

هۆکارە زانراوەکان؛ لەبارەی ئەوەی بۆچی بڕیاری خەرجکردنی مووچە نەدرا، وەزیرێکی حکومەتی عێراق کە لە کۆبوونەوەکەدا بەشدار بوو، قسەی بۆ ئاڤا کردووە و دەڵێت دوو هۆکار هەیە:

یەکەم؛ هێشتا حکومەتی عێراق دەستی بە دابەشکردنی مووچەی مانگی 10ی فەرمانبەرانی خۆی نەکردووە، بڕیارە هەفتەی داهاتوو دەستپێبکات.

دووەم؛ حکومەتی عێراق چاوەڕوانی ناردنی 120 ملیار دینار داهاتی نانەوتی مانگی هەشتی کوردستانە، سوودانی هەفتەی ڕابردوو ئەمەی بە وەزیرانی کورد گوتبوو.

بۆچوونی بەرامبەر؛ لەبارەی ناردنی داهاتی ناوخۆ، ئاڤا زانیویەتی حکومەتی کوردستانیش چاوەڕوانی ئەوەیە بڕیاری خەرجکردنی مووچە بدرێت ئینجا 120 ملیارەکە بنێرێت. لە مانگەكانی ڕابردووشدا هەروابووە بڕیاری خەرجکردنی مووچە دراوە دواتر داهاتی نانەوتی نێردراوە.

پێشتر مەسرور بارزانی، سەرۆکوەزیرانی کوردستان لە نامەیەکی تایبەتدا بۆ سوودانی، پابەندبووی حکومەتی کوردستانی بە رێککەوتنەکان دووپات کردبووەوە، دڵنیایی دابوو ئامادەن مانگانە 120 ملیار دینار بنێرن تا دەگەنە ڕێککەوتنی کۆتایی.

بە تەنیشت ئەم بابەتەوە؛ لەبارەی ڕێککەوتنی کۆتاییش لەسەر داهاتی نانەوتی، سوودانی هەفتەی ڕابردوو لەسەر داوای مەسرور بارزانی بڕیاری دا شاندە دانوستانکارەکان دەست بە گفتوگۆ بکەنەوە، حکومەتی کوردستانیش ئامادەیی دەربڕیوە شاند بنێرێت، بەڵام تا ئێستا بەغدا کاتی کۆبوونەوەکەی دیاری نەکردووە.