پارتی و یەکێتی: یەکەم کۆبوونەوەمان لەبارەی پێکهێنانی حکومەت ئەرێنی بوو

ئاڤا نیوز

 

شاندی دانوستاندنكاری پارتی دیموكراتی كوردستان سەردانی یەكێتیی نیشتمانی كوردستانی لە دەباشان لە سلێمانی كرد و دوای كۆبوونەوەی نێوانیان، ڕاگەیێنراوێكی هاوبەشیان بڵاوكردەوە.

 

ڕاگەیێنراوی فەرمی: بەپێی ڕاگەیێنراوێكی هاوبەشی هەردوولا، كۆبوونەوەكە لە کەشێکی ئەرێنیدا بەڕێوەچوو، پێکەوە باسیان لە بابەتی قۆناغی پاش هەڵبژاردنی خولی شەشەمی پەرلەمانی کورستان کرد، هاوکات باسی ئەگەر و ئامادەکارییەکانی چۆنییەتی کارکردنیان کرد بە شێوازێک کە لەبەرژەوەندی خەڵکی کوردستان بێت.

 

لەلایەكی دیكەوە: هەردوو شاندی دانوستاندنکاری پارتی و یەکێتی ئامادەییان دەربڕی بۆ درێژەدان بە کۆبوونەوەکانی نێوانیان و هەموو حیزب و لایەنە کوردستانییەکانی دیکەش.

 

ئەوەی پێویستە بیزانیت: سەبارەت بە دانیشتنی یەکەمی پەرلەمانی کوردستانیش کە بڕیارە ڕۆژی دووشەممە 2-12-2024 بەڕێوەبچێت، پارتی و یەكێتی هاوڕابوون لەبارەی گرنگبوونی لێکتێگەیشتنی باش بۆ ئەنجامدانی کۆبوونەوەکە.