ڕۆژئاوای کوردستان داوای پشتیوانیی لە کۆمەڵگەی نێودەوڵەتی دەکات

ئاڤا نیوز

 

ئیدارەی خۆبەڕێوەبەری ڕۆژئاوای کوردستان داوا لە کۆمەڵگەی نێودەوڵەتی دەکات بە مەبەستی پاراستنی ناوچەکانی ژێر دەسەڵاتی و پاراستنی پێکهاتەکانی ناو ئەو سنوورە جوگرافییە، کۆمەڵگەی نێودەوڵەتی پشتیوانیی بکات.

 

وێنە گەورەکە: دوێنێ گرووپە چەکدارەکانی ئۆپۆزسیۆنی سووریا، شارۆچکەی تل ڕەفعەتییان لە باکووری حەلەب کۆنتڕۆڵکرد کە لە ئیدارەی خۆبەڕێوەبەری ڕۆژئاوای کوردستانە و بە کانتۆنی شەهبا و عەفرین ناسرابوو، هەرچەندە هەسەدە دەڵێت، چەند ساڵێکە هێزی لەو شارەدا نەماوە بەڵام ئۆپۆزسیۆنی سووریا دەڵێت، ئەو شارەی دوای ڕووبەڕووبوونەوە لەگەڵ هێزە کوردییەکان کۆنتڕۆڵکردووە.

 

ڕاگەیێنراوی فەرمی: ئیدارەی خۆبەڕێوەبەری ڕۆژئاوای کوردستان لە ڕاگەیێنراوێکدا ئاماژەی بەوەشكردوە، پێویستە کۆمەڵگەی نێودەوڵەتی ڕێگە بە تورکیا نەدات گرژییەکان زیاتر بکات، ئەویش لە ڕێگەی هاندانی گرووپە چەکدارەکانی نزیک لە خۆی بۆ هێرشکردنە سەر ناوچەکانی ئیدارەی خۆبەڕێوەبەری لە حەلەب و دەورووبەری.

 

ئەوەشی خستووەتەڕوو، دۆخی سووریا لەئاستی سەربازی و نەخشەی هێزدا لە گۆڕانکاریی خێرادایە و گرووپە چەکدارەکان بە هێرشەکانیان دەیانەوێت ڕاستییەکان لەبارەی ناوچە کوردییەکانەوە بشارنەوە، جەختیش دەکاتەوە کە بۆ پاراستنی ئارامی سووریا ئامادەیە بۆ گفتوگۆ و لێکتێگەیشتن لەگەڵ هەموو لایەنەکانی سووریا.