سیروان بارزانی: شەڕی سووریا ئومێد بە داعش دەدات لە عێراق

ئاڤا نیوز

 

ئاڵۆزییەکانی سووریا کاریگەری لەسەر داعش لە عێراق دروست کردووە، سەرپەرشتیاری میحوەری مەخموور - گوێر لەمبارەیەوە دەڵێت "ڕووداوەکانی سووریا ئومێدی بە داعش لەعێراق داوە، بەڵام ژمارەیان زیادی نەکردووە".

 

وێنە گەورەکە: جموجوڵەکانی داعش لە دەوروبەری کەرکووک و ئەو بۆشاییە ئەمنییەی لەنێوان هێزی پێشمەرگە و سوپای عێراقدا هەیە زیادی کردووە، ئەوەش مەترسی لای خەڵک دروست کردووە، کە جارێکی دیکە داعش ببێتە هەڕەشە و مەترسی لەسەر عێراق و هەرێمی کوردستان دروست بکات.

 

لێدوانی فەرمی: سیروان بارزانی، سەرپەرشتیاری میحوەری مەخموور - گوێر بە ئاڤا نیوزی ڕاگەیاند: جموجوڵەکانی داعش بەهۆی ڕووداوەکانی سووریاوە زیادیان نەکردووە، بەڵام مەعنەویات بە داعش و شانە نووستووەکانیان لە عێراق دەدات، تاوەکو دوو هەفتەی دیکە دەردەکەوێت ئەو پلان و مەرامەی ئاڵۆزییەکانی سووریا چی بووە و لە بەرژەوەندی کێیە.

 

زانیاریی زیاتر: پێشمەرگە لەسنوورەکاندا خراونەتە ئامادەباشییەوە، چونکە مەفرەزەی بچووکی داعش لەو ناوچانەی بۆشایی ئەمنیان تێدایە هەیە و جموجوڵیان هەیە.

 

ئەوەی پێویستە بیزانیت: بۆشایی ئەمنی لەنێوان هێزی پێشمەرگە و سوپای عێراق لە دەوروبەری خانەقین تاوەکو زێی گەورە و میحوەری حەوت لە سنووری نەینەوا هەیە، زۆرترین بۆشایی ئەمنی لە میحوەری شەشە و درێژییەکەی 120 کیلۆمەترە و پانییەکەی 6 کیلۆمەترە، تەنیا 40%ـی ئەو بۆشاییە ئەمنییە بە دوو فەوجی لیوا هاوبەشەکان پڕکراوەتەوە و 60%ـی بۆشاییەکە ماوە.