نورەددین بابا بۆ ئاڤا : گەمارۆی شاری حومس- مان داوە و بەمزوانە دەچینە ناو شارەکە

ئاڤا نیوز

 

ئەندامێکی دەستەی ئۆپەراسیۆنی سەربازیی لە حەلەب ئاشکرایکرد، هێزەکانیان ئێستا ناوچەیەکی فراوانیان لە سووریا کۆنتڕۆڵ کردووە، هاوکات بەتەواوی گەمارووی شاری حومسیان داوە.

 

لێدوانی فەرمی: نورەددین بابا، ئەندامی دەستەی ئۆپەراسیۆنی سەربازیی لە حەلەب بە ئاڤا میدیای گوت: سوپای سووریا توانای بەرگریی نەماوە و لەبەرەکانی شەڕدا هەڵدێن، ئەمەش جگە لەوەی ڕۆژانە چەندین فەرماندە و ئەفسەری سەربازیی و هەواڵگریی پەیوەندیمان پێوەدەکەن و چاوەڕێی بڕیاری ئێمەن بۆ ئەوەی لە ڕژێمی ئەسەد هەڵبگەرێنەوە و پەیوەندی بە هێزەکانی ئێمەوە بکەن و دیمەشق ڕزگار بکەین.

زانیاریی زیاتر: سەبارەت بە پەیوەندییەکانیان لەگەڵ هێزەکانی سووریای دیموکرات "هەسەد" بابا ڕایگەیاند: سنووری ئەو ناوچانەی پارتی کرێکارانی کوردستان" پەکەکە"  کۆنتڕۆڵی کردووە لەگەڵ سنووری ناوچەکانی ئێمەیە و نامانەوێت بەهێچ شێوەیەک ڕووی چەکەکانمان ئاڕاستەی ئەوان بکەین، بەڵام پەکەکە بەردەوام پاڵپشتی ڕژێمەکەی بەشار ئەسەدیان کردووە چەندین جار خیانەتیان لێکردوین.

 

قووڵتر: "هیوادارین  پەکەکە  دەستبەرداری هاوپەیمانێتییەکەیان بن لەگەڵ ئەسەد و پێویستە بگەڕێنەوە بۆ ڕۆژهەڵاتی ڕووباری فورات، وەک ئۆپۆزسیۆن گفتوگۆ و ڕێککەتنمان لەگەڵیاندا هەیە، نامانەوێت ڕووبەڕووی یەکتر ببینەوە نە ئێستا و نە لە داهاتوودا"، بابا وای گوت.