لەبارەی پڕکردنەوەی فۆڕمی ئەلیکترۆنی بەشەخۆراک هۆشداریی دەدرێت بە هاووڵاتییان

ئاڤا نیوز

دوای ئەوەی بۆ ماوەی 10 ڕۆژ لە سەر داوای وەزارەتی بازرگانی و پیشەسازی هەرێمی کوردستان، ئەپڵیکەیشنی فۆڕمی ئەلیکترۆنی خۆراک کرا کرایەوە، ئێستا هۆشداریی دەدرێت بە هاووڵاتییان کە لە دوای ئەو وادەیەوە ناتوانن بە خۆڕایی لەو خزمەتگوزارییە سوودمەندبن. 

چیرۆکی سەرەکی: لە ماوەی ڕابردوو وەزارەتی بارزگانی عێراق بە ئەلیکترۆنیکردنی فۆرمی خۆراکی ڕاگەیاند و ئەپڵیکەیشنێکی تایبەتی بۆ ئەوەی هاووڵاتییان دروست کرد تاوەکو بتوانن لەو ڕێگەیەوە ناوی خۆیان تۆمار بکەن، لە هەرێمی کوردستانیش دووجار وادەکەی درێژکرایەوە، بەڵام نزیکەی 13%ـی هاووڵاتییان کوردستان بەهۆکاری جیاواز فۆرمەکەیان پڕنەکردووەتەوە و بەشەخۆراکیان ڕاگیراوە.

لێدوانی فەرمی: نەوزاد شێخ کامیل، بەڕێوەبەری گشتیی لە وەزارەتی بارزانی و پێشەسازی هەرێمی کوردستان، بە ئاڤا میدیای ڕاگەیاند، داوامان کرد جارێکی دیکە ئەپڵیکەیشنی فۆرمی ئەلیکترۆنی خۆراک کارا بکرێتەوە تاوەکو 20-11-2025، بەڵام دوای ئەو وادەیە هاووڵاتییان ناتوانن بەشێوەی خۆڕایی سوودمەندبن لە پڕکردنەوەی فۆڕمەکە. 

- لەدوای ئەو بەروارەوە قۆناغی دووەمی پڕکردنەوەی فۆڕمەکە دەستپێدەکات، ئەویش زیادکردنی ناوی منداڵ و گواستنەوەی پسوولەیە لە نێوان پارێزگاکاندا.

زانیاریی زیاتر: بەر لە کارکردنەوەی ئەپڵیکەیشنی فۆڕمی ئەلیکترۆنی خۆراک، نزیکە 700 هەزار کەس مابوون خۆیان تۆمار بکەن، ئێستا دوای ئەو وادەیە دەکرێت ڕێژەکە کەمبووبێتەوە.