لە چەند ڕۆژی داهاتوو پارەی بژمێرەکان خەرج دەکرێت

ئاڤا نیوز

 

پرۆسەی سەرژمێریی گشتیی دانیشتووان لە سەرانسەری عێراق و هەرێمی کوردستان بە کۆتا هات و چاوەڕوان دەکرێت لە چەند ڕۆژی داهاتوودا پارەی بژمێرەکان خەرج بکرێت.

 

وێنە گەورەکە: کاتژمێر 12:00ـی شەوی شەممە 15-12-2024، سەرژمێری لە عێراق و هەرێمی کوردستان بە کۆتا هات، بڕیاریشە لە چەند ڕۆژی داهاتوودا بەشێکی پارەی بژمێرەکان خەرج بکرێت، هاوکات بەپێی گرێبەستەکەیان، دەبێت پارەی دوو مانگیان پێ بدرێت.

 

لێدوانی فەرمی: دڵزار حەمەساڵح، بەڕێوەبەری ئاماری هەولێر بە شەوکەت قادر پەیامنێری ئاڤای ڕاگەیاند: لەچەند ڕۆژی داهاتوودا پارەی مانگێکی کارکردن بۆ بژمێرەکان خەرج دەکرێت، هاوکات ئەو بڕەی دەمێنێتەوە، وەزارەتی پلاندانی عێراق و دەستەی ئاماری هەرێمی کوردستان کاتی وەرگرتنەکەی دیاری دەکەن.

 

ئەمەش بزانە: بەگوێرەی ئەنجامی سەرژمێری، ژمارەی دانیشتووانی هەرێمی کوردستان شەش ملیۆن و 370 هەزار و 668 کەسە. سەرژمێرییەکە ئەوەشی دەرخستووە زۆرینەی دانیشتووانی هەرێمی کوردستان گەنجن و لە تەمەنی کارکردندان.