سبەی لە کەرکووک پارتی یەکێک لە گەورەترین کەرنەڤاڵەکانی بانگەشەی هەڵبژاردن ئەنجام دەدات

ئاڤا نیوز

هەرچەندە لە دەستپێکی بانگەشەی هەڵبژاردنەوە، پارتی دیموکراتی کوردستان لە شاری کەرکووکیش دەستی بە هەڵواسینی پۆستەری لیست و کاندیدانی کردووە بەڵام سبەی بە کەرنەڤاڵێکی گەورە بە فەرمی دەست دەکات بە بانگەشە و 24 کاندیدی سنووری بازنەی کەرکووک دەناسێنێت.

لێدوانی فەرمی: هیوا ئەحمەد مستەفا، ئەندامی مەکتەبی سیاسی و  بەرپرسی مەکتەبی ڕێکخستنی کەرکووک – گەرمیانی پارتی دیموکراتی کوردستان بە ئاڤای ڕاگەیاند: ڕۆژی شەممە لە گەڕەکی شۆریجەی شاری کەرکووک کەرنەڤاڵێکی گەورەی جەماوەریی ئەنجام دەدەین بۆ ناساندنی کاندیدەکانی پارتی لە سنووری کەرکووک بۆ هەڵبژاردنی پەرلەمانی عێراق، ئەمە دەبێتە دەستپێکی کەرنەڤاڵ و ئاهەنگە گەورەکانی پارتی بۆ ئەم هەڵبژاردنە.

ئاماژەی بە ئەوەش دا کە چاوەڕوان دەکرێت نزیکەی 15 هەزار کەس لە جەماوەری پارتی لە کەرنەڤاڵەکە ئامادە بن و هەر 24 کاندیدەکەی پارتی لە بازنەی کەرکووک دەناسێندرێن.

جەختیشی کردەوە کە دۆخی پارتی لە کەرکووک و دەوروبەری باشە و مۆڕاڵ و گەرموگوڕییەکی باش هەیە و دوێنێ دوو بارەگای لیژنەی ناوچەی پارتی لە داقووق و لەیلان بە ئاڵای کوردستانەوە کرانەوە کە لە 16ی ئۆکتۆبەرەوە داخرا بوون

هیوا ئەحمەد مستەفا گوتیشی: دۆخی کەرکووک لە شارەکانی دیکە جیاوازە و ڕێنماییمان بۆ خەڵک و دەنگدەرانمان ئەوەیە هێمن و لەسەرخۆ بن و بانگەشەیەکی ئارام و دوور لە هەڵچوون ئەنجام بدەن، پێویستە ڕێز لە هەموو پێکهاتە و لایەنەکانی سنوورەکەش بگیرێت

ئەوەشی خستەڕوو کە تاوەکوو ئێستا هیچ ڕێگرییەک لە تیمەکانی بانگەشەی هەڵبژاردنی پارتی لە سنووری کەرکووک نەکراوە و جەختیشی کردەوە کە هێزە ئەمنییەکان هاوکارن.