بەڕێوەبەرایەتیی خۆسەر دیمەشق بە ئەنجامدانی "جەنگی قڕکردن" دژی کورد لە کۆبانی تۆمەتبار دەکات

ئاڤا نیوز

بەڕێوەبەرایەتیی خۆسەری باکوور و ڕۆژهەڵاتی سووریا ڕایدەگەیێنێت، گرووپە چەکدارەکانی سەر بە حکومەتی کاتی لە دیمەشق بە شێوەیەکی سیستماتیک ئاگربەست پێشێل دەکەن و جەنگی "قڕکردنیان" دژی کورد لە کۆبانی و جەزیرە دەستپێکردووە.

ڕاگەیێنراوی فەرمی: بەڕێوەبەرایەتیی خۆسەر، لە ڕاگەیێنراوێکدا دەڵێت: سەرەڕای پابەندیی تەواوی ئەوان بە ڕاگرتنی شەڕ بۆ پاراستنی خوێنی هاووڵاتییان، بەڵام لایەنی بەرامبەر بۆردوومانی ناوچە نیشتەجێبووەکان دەکات و شاری کۆبانی لە ئاو، کارەبا و خزمەتگوزارییە سەرەتاییەکان بێبەش کردووە.

ئیدارەی خۆسەر، دەشڵێت: "بەئامانجگرتنی کۆبانی کە هێمای تێشکاندنی داعشە، تاوانێکی جەنگی تەواوە و بڕینی تۆڕی ئینتەرنێت لەو شارە هەوڵێکە بۆ دابڕینی لە جیهان و داپۆشینی پێشێلکارییەکان."

زانیاریی زیاتر: بەگوێرەی ڕاگەیێنراوەکەی خۆسەر، داوای لە هاوپەیمانی نێودەوڵەتی دەکات دەستبەجێ دەستوەردان بکەن بۆ ڕاگرتنی هێرشەکان، هاوکات بانگەوازێکی ئاراستەی کوردانی هەر چوار پارچەی کوردستان و تاراوگە کرد تاوەکو بۆ پاراستنی دەستکەوتە نەتەوەییەکان یەکدەنگ بن.

ئیدارەی خۆسەر، هێرشبەران بە بەرپرسیاری هەر کارەساتێکی مرۆیی دەزانێت و دووپاتی دەكاتەوە کە ئیرادەی گەل لە بەرامبەر ئەم هەوڵە مەترسیدارانەی بۆ شکاندنی خۆڕاگریی نەتەوەیی ئەنجام دەدرێن، سەرکەوتوو دەبێت.

٠ پاشەکشە لە مافە ڕەواکانیان ناکەن، چونکە ئەمڕۆ ڕۆژی یەکڕیزیی نیشتمانییە لە دژی سیاسەتی قڕکردن.