ئەمڕۆ براوەی خەڵاتی نۆبڵی ئاشتی ڕادەگەیێنرێت

ئاڤا نیوز

بڕیارە ئەمڕۆ هەینی، 10-10-2025، خەڵاتی نۆبڵی ئاشتی بۆ ساڵی 2025 ڕابگەیێنرێت و ساڵی ئایندەش براوەی خەڵاتەکە لە مەراسیـمێکی تایبەتدا خەڵاتەکە وەردەگرێت.

ئەوەی پێویستە بیزانیت: خەڵاتەکە لەلایەن پەیمانگای نەرویجی بۆ نۆبڵ لە ئۆسلۆ، لە کاتژمێر 12ـی نیوەڕۆ بە کاتی هەولێر، ڕادەگەیێنرێت، 338 بەربژێر بۆ ئەم خەڵاتە هەن، لەناویاندا 244 کەس و 94 ڕێکخراو.

زانیاریی زیاتر: دۆناڵد ترەمپ، سەرۆکی ئەمریکا، یەکێکە لە بەربژێرەکان و چەندینجار گوتوویەتی لەبەر وەستانی چەند شەڕ لە سەر ئاستی جیهان، لەوانەش شەڕی غەززەی نێوان ئسیرائیل و حەماس، شەڕی نێوان هیندستان و پاکستان، شەڕی نێوان ئازەربایجان و ئەرمینیا، شەڕی نێوان ئێران و ئیسرائیل، شایەنی خەڵاتەکەیە.

پێشبینییەکان: بەشێک لە پێشبینییەکان ئاماژە بەوە دەدەن کە لەبەر زۆریی شەڕ و نائارامییەکانی ئەمساڵ، ئەمساڵ ئەم خەڵاتە دابەش ناکرێت و بە کەس نادرێت.

باکگراوند: ئەم خەڵاتە لەلایەن ئەلفرێد نۆبڵ داهێنراوە و لەدوای مردنیشییەوە تاوەکوو ئێستا دابەش دەکرێت کە ماوەی 124 ساڵە، خەڵاتەکە دەدرێت بەو کەسانەی کە لە هێنانە ئارای ئاشتیدا ڕۆڵیان هەبووە. براوەی خەڵاتەکە بڕوانامەی دیپلۆم و مەدالیایەکی زێڕی پێدەدرێت و خەڵاتەکە بەها 1.2 ملیۆن دۆلاری هەیە.