عەلی عەللاق: تەنیا ژمارەیەکی دیاریکراوی بانکی دیجیتاڵی مۆڵەتیان پێ دەدرێت

ئاڤا نیوز

پارێزگاری بانکی ناوەندیی عێراق ڕایدەگەیێنێت، بانکەکەیان ژمارەیەکی بەرچاو داواکاری بۆ دامەزراندنی بانکە دیجیتاڵییەکان وەرگرتووە، کە نزیکەی 80 داواکاری دەبێت.

 

بۆچی گرنگە: گرنگی بانکە دیجیتاڵییەکان ئەوەیە کرداری پێدانی پارە ئاسان دەکات هاوکات فرۆشی ئەلیکترۆنی فراوان دەکات. عێراق کە خۆی بە دەست دیناری ساختەوە دەناڵێنێت بەمەش دەتوانێت پارەی چاپکراو لە بازاڕ ڕێکبخاتەوە.

 

لێدوانی فەرمی: عەلی عەللاق، پارێزگاری بانکی ناوەندیی عێراق، بە ئاژانسی هەواڵی عێراقی ڕاگەیاند، "سەرەڕای زۆری ژمارەی داواکارییەکان، مۆڵەت تەنیا بە ژمارەیەکی دیاریکراو دەدرێت، چونکە ژمارەی بانکە دیجیتاڵییەکان لە وڵاتانی دیکەشدا هەمیشە لە چوار بانک تێپەڕ ناکات. گوتیشی: "بانکی ناوەندی پڕۆسەیەکی وردی پێداچوونەوەی دەستپێکردووە کە پشت بە توێژینەوەی بازاڕ، سرووشتی کار و ئەزموونی جیهانی دەبەستێت".

 

لەهەمان کاتدا: پارێزگاری بانکی ناوەندی ئاماژەی بەوەشدا، بۆ دڵنیابوون لە شایستەیی و باشترین پێوەرەکان، کۆمپانیای نێودەوڵەتی "ئۆلیڤەر وایمان" لەم پڕۆسەیەدا بەشدار کراوە بۆ پێداچوونەوە بە پێوەرەکانی مۆڵەتدان. چاوەڕوان دەکرێت لە چەند ڕۆژی داهاتوودا بڕیاری کۆتایی بدرێت و ناوی ئەو بانکانە ڕابگەیەنرێت کە مۆڵەتیان پێدەدرێت.