سێ پۆندی دیكە و دارستانێكی سرووشتی لە هەرێمی كوردستان دروست دەكرێن

ئاڤا نیوز 

 

وەزارەتی كشتوكاڵ و سەرچاوەكانی ئاوی حكومەتی هەرێمی كوردستان بە هاوبەشی لەگەڵ ڕێكخراوی خۆراكی جیهانیی WFP، ژمارەیەک پڕۆژە جێبەجێ دەکات، لەو چوارچێوەیەشدا سێ پۆندی دیکە و دارستانێکی سروشتی دروست دەکرێت. 

 

 

وێنە گەورەكە: یاداشتێكی لێكتێگەیشتن لەنێوان وەزارەتی كشتوكاڵ و ڕێكخراوی خۆراكی جیهانی هەیە،  ڕاسپاردەکانی یاداشتەكە لە چوارچێوەی پێشخستنی سێکتەری کشتوکاڵ و ئاودێری و چۆنیەتی بەهێزکردنی ژێرخانی ئاسایشی خۆراک و خێراکردنی پڕۆگرام و بەرنامەکانی کەمکردنەوەی کاریگەری و مەترسییەکانی گۆرانکاریی کەشوهەوا لە هەرێمی کوردستانن.

 

 

 

ڕاگەیێنراوی فەرمی: بەپێی ڕاگەیێنراوێكی وەزارەتی كشتوكاڵ، لە هەرێمی كوردستان دارستانێكی دەستكرد لەسەر ڕووبەری 1200 دۆنم زەوی لەچوارچێوەی پڕۆژەكانی سێكتەری باخداری بە هاوبەشیی نێوان وەزارەتەكە و ڕێكخراوی خۆراكی جیهانی جێبەجێ دەكرێت.

 

 

زانیاریی زیاتر: هەردوولا سەرقاڵی گفتوگۆن بۆ دروستكردنی سێ پۆندی ستراتیژی لە سێ ناوچەی جیاوازی هەرێمی كوردستان، ئێستا لە قۆناغی دەستنیشانكردنی شوێنی پۆندەكانن،  هاوكات بەپێی یاداشتی نێوانیان، ئەو پۆندانەشی كە زۆر پێویست و گرنگن نۆژەندەكرێنەوە و چاكسازییان تێدا دەكرێت، ئەمەش لەچوارچێوەی پڕۆژەی پۆندسازی و هەرەوەزی و پاڵپشتی جووتیاران.

 

لەلایەکی دیکەوە: وەزارەتی كشتوكاڵ و ڕێكخراوی WFP كار دەكەن بۆ چارەسەرکردنی گرفتی ئاوی قورسی سنووری بازیان لە سلێمانی، هەروەها چارەسەرکردن  و چاکسازیکردنی ئاوی بەنداوی دێوانە و کاراکردنی وێستگەکانی کەشناسی و ڕاهێنانی ستافی کادیران و فەرمانبەرانی تایبەت بە بەکارهێنانی وێستگەکان.