پسپۆڕێکی وزە: ڕێککەوتنەکەی عێراق کۆی دۆسیەی نەوتی کەرکووک "دەخاتەژێر دەستی" کۆمپانیایەکی بەریتانی

ئاڤا نیوز

 

پسپۆڕێکی وزە دەڵێت، بەگوێرەی ڕێککەوتنەکەی نێوان حکومەتی عێراق و کۆمپانیای بریتیش پیترۆلیۆم (بی پی) بۆ پەرەپێدانی کێڵگە نەوتییەکانی کەرکووک، کۆمپانیا بەریتانییەکە سەرپەرشتی بەرهەمهێنان، بەڕێوەبردن و نۆژەنکردنەوەی کێڵگە نەوتییەکانی پارێزگاکە دەکات.

 

ئەوەی پێویستە بیزانیت: دوێنێ لە لەندن و بە ئامادەبوونی حەییان عەبدولغەنی، وەزیری نەوتی عێراق، کۆمپانیای نەوتی باکوور یاداشتێکی لێکتێگەیشتنی لەگەڵ کۆمپانیای بریتیش پیترۆلیۆم واژۆ کرد، ئەویش بە ئامانجی دووبارە گەشەپێدانی تەواوی هەر چوار کێڵگە نەوتییەکەی پارێزگای کەرکووک و زیادکردنی باشترین بڕی بەرهەمهێنانی نەوت و غاز لەو کێڵگانەدا.

 

لێدوانی فەرمی: شوان زوڵاڵ، پسپۆڕی وزە لە لەندەن میوانی گەشتی هەواڵەکانی کاتژمێری 12:00ـی ئاڤا میدیا بوو و ڕایگەیاند، "نزیکەی 15 ساڵ بوو بەهۆی کێشەی خاوەندارێتی لەنێوان هەرێمی کوردستان و عێراق، کۆمپانیای بی پی خواستی ئەوەی نەبوو بێت و لە کەرکووک وەبەرهێنان لە بواری نەوت بکات، بەڵام وەک دەردەکەوێت ئێستا ڕەنگە ئەو نیگەرانییەی نەمابێت و بەبێ ڕەزامەندی هەرێمی کوردستان، دەیەوێت لە کەرکووک وەبەرهێنان لە کەرتی نەوت بکات.

 

بەوتەی ئەو پسپۆڕە هاوسەنگی هێزی سیاسی لە نێوان حکومەتی هەرێمی کوردستان و حکومەتی فیدراڵ کاریگەری لەسەر ئەو ڕێککەوتنە دەبێت، ئاشکراشی دەکات کە بەگوێرەی ڕێککەوتنەکە لە پرۆسەکانی وەبەرهێنان، بەڕێوەبردن و نۆژەنکردنەوەی کێڵگە نەوتییەکانی کەرکووک، کۆمپانیای بی پی دەبێتە هاوبەشی کۆمپانیای نەوتی باکوور.

 

خاڵە ئەرێنییەکان: وەک شوان زوڵاڵ باسی کرد، زیادبوونی بەرهەمهێنانی نەوت لە کەرکووک و هەناردەکردنی لەڕێگەی بۆری نەوتی کوردستانەوە، پێدەچێت کارئاسانی بکات بۆ دووبارە دەستپێکردنەوەی هەناردەی نەوتی هەرێمی کوردستان و باشترکردنی دۆخی دارایی هەرێمی کوردستان.