یەکەم کاروانی نەوتەکەی بەغدا گەیشتە هەرێمی کوردستان

ئاڤا نیوز

وەزارەتی سامانە سرووشتییەکان لە ڕاگەیێنراوێکدا دەڵێت، کاروانی یەکەمی نەوتی سپی لە وەزارەتی نەوتی عێراقی فیدڕاڵەوە گەیشتە پاریزگای هەولێر و بڕیارە لەم دوو ڕۆژرەدا بۆ پارێزگاکانی دیکەی هەرێمی کوردستانیش بنێردرێت.

 

ڕاگەیێنراوی فەرمی: وەزارەتی سامانە سرووشتییەکانی حکومەتی هەرێمی کوردستان ڕایگەیاند، وەزارەتی نەوتی عێراقی فیدڕاڵ تەنیا ڕەزامەندیی لەسەر (19%)ی پشکی هەرێمی کوردستان لە نەوتی سپی داوە، بڕیاریشە نەوتەکە هەفتەی داهاتوو بەسەر خێزانەکانی هەرێمی کوردستان لە ناوچە شاخاوییەکانی پارێزگا و ئیدارە سەربەخۆکان دابەش بکرێت.

 

زانیاری زیاتر: هەرێمی کوردستان پشکی لە بەرهەمی نەوت و وزەی عێراق هەیە، بەگوێرەی ڕێککەوتنی نێوان وەزارەتی سامانە سرووشتییەکان و وەزارەتی نەوتی عێراق، دەبێت حکومەتی فیدڕاڵ هاوشێوەی پارێزگاکانی عێراق نەوتی سپی بە نرخی پاڵپشتکراو بۆ هەرێمی کوردستان بنێرێت، بڕیاردراوە 50 ملیۆن لیتر بنێرێت.

 

لەلایەکی دیکەوە: پێشتریش ئەندامێکی لیژنەی نەوت و وزە لە پەرلەمانی عێراق بە ئاڤا نیوزی گوتبوو، ڕەزامەندی وەزیری نەوتی عێراقیان وەرگرتووە لەسەر نرخی نەوت کە 250 دینار بۆ هەر لیترێک وەربگیرێت، چونکە ئەوان داوای 500 دینار بۆ هەر لیترێک دەکەن.

 

ژمارەکان وادەڵێن: ئەو بڕە نەوتەی کە بڕیارە بنێردرێت، 32% بۆ پارێزگای هەولێر، 18% بۆ پارێزگای دهۆک، 50% بۆ هەر یەکە لە پارێزگاکانی سلێمانی و هەڵەبجە دەبێت.