عێراق بڕیاری دا ساڵانە 50 ملیۆن لیتر نەوتی سپی بۆ هەرێمی کوردستان بنێرێت

ئاڤا نیوز

 

شاندێکی وەزارەتی سامانە سرووشتیەکان و لیژنەی نەوت و وزە لە پەرلەمانی عێراق، لەگەڵ شاندێکی وەزارەتی نەوتی عێراق کۆبوونەوە، هاوکات لێکتێگەیشتن بۆ دەستپێکردنەوەی ناردنی بەنزینی حکومی عێراق بۆ هەرێمی کوردستان کرا.

 

وێنە گەورەکە: هەرێمی کوردستان پشکی لە بەرهەمی نەوت و وزەی عێراق هەیە، بەگوێرەی ڕێککەوتنی نێوان وەزارەتی سامانە سروشتییەکان و وەزارەتی نەوتی عێراق، دەبێت حکومەتی فیدراڵی هاوشێوەی پارێزگاکانی عێراق نەوتی سپی بۆ هەرێمی کوردستان بنێرێت، کە ئەمساڵ هیچ بڕێکی نەناردووە.

 

لێدوانی فەرمی: د. سەباح سوبحی، ئەندامی لیژنەی نەوت و وزە لە پەرلەمانی عێراق بە ئاڤا نیوزی گوت، "وەزارەتی نەوتی عێراق ڕەزامەندی لەسەر ناردنی بڕی 50 ملیۆن لیتر نەوتی سپی بۆ هەرێمی کوردستان دا، لە ئایندەیەکی نزیک کاروانی ناردنی نەوت بۆ هەرێمی کوردستان دەستپێدەکات."

 

لەلایەکی دیکەوە: سەبارەت بە دەستپێکردنەوەی ناردنی بەنزینی حکومی بۆ هەرێمی کوردستان لەلایەن حکومەتی فیدڕاڵییەوە، کە لە مانگی 11ـی 2023 ـەوە ڕاگیراوە، لە کۆبوونەوەی ئەمڕۆ لێکتێگەیشتن بۆ دەستپێکردنەوەی پرۆسەکە کراوە.