ئەمریکا مەرجی ئاوەدانکردنەوەی غەززە ئاشکرا دەکات

ئاڤا نیوز

ئیدارەی دۆناڵد ترەمپ ڕایگەیاند، هیچ پڕۆسەیەکی ئاوەدانکردنەوە لە کەرتی غەززە دەستپێناکات تاوەکو بزووتنەوەی حەماس بە تەواویی هەڵنەوەشێتەوە و چەکەکانی ڕادەست نەکات.

لێدوانی فەرمی: بەرپرسێکی ئەمریکی بە کەناڵی 'حەدەس'ی ڕاگەیاند: "دۆناڵد ترەمپ بە وردیی چاودێریی سەرجەم وردەکارییەکانی ڕێککەوتنی غەززە دەکات؛ هیچ پڕۆسەیەکی ئاوەدانکردنەوە دەستپێناکات تا ئەو کاتەی بزووتنەوەی حەماس هەڵنەوەشێنرێتەوە و چەکداماڵین نەکات."

زانیاریی زیاتر: ئەم هەڵوێستە نوێیەی واشنتن هاوتەریبە لەگەڵ تێڕوانینەکانی حکومەتی ئیسرائیل، بە جۆرێک دۆناڵد ترەمپ و بنیامین نەتەنیاهۆ هاوڕان لەسەر ئەوەی کە نابێت بەبێ هەڵوەشاندنەوەی حەماس هیچ هەنگاوێکی کردەییی بۆ بنیادنانەوە بنرێت.

 لەلایەکی دیکەوە: ئیدارەی نوێی ئەمریکا دەیەوێت لەرێگەی "دەستەی ئاشتیی"یەوە، کەرتی غەززە لە ناوچەیەکی جەنگ و وێرانکەرەوە بگۆڕێت بۆ هەرێمێکی گەشەپێدراوی ئابووریی. ئەم پڕۆسەیە تەنها لەژێر سەرپەرشتیی ڕاستەوخۆی ئەمریکا و هاوپەیمانە ناوچەییەکاندا دەبێت و تێیدا حەماس هیچ ڕۆڵێکی سیاسیی و سەربازیی نامێنێت، کە ئەمەش مەرجی بنەڕەتیی واشنتنە بۆ کاراکردنی پڕۆژە زەبەلاحەکانی وەبەرهێنان لە ناوچەکەدا تاوەکو گەرەنتیی ئارامیی هەمیشەیی بکرێت.