بکوژی سێ ئەندامی خێزانەکەی هەولێر دەستگیرکرا

ئاڤا نیوز

بەڕێوەبەرایەتیی ئاسایشی هەولێر دەستگیرکردنی ئەو تۆمەتبارەی ڕاگەیاند کە ڕۆژی یەکشەممە سێ ئەندامی خێزانێکی لە گەڕەکی شۆڕشی شاری هەولێر کوشتبوو.

ڕاگەیێنراوی فەرمی: بەڕێوەبەرایەتیی ئاسایشی هەولێر ڕایگەیاند: ئەو تۆمەتبارەی هەڵسابوو بە ئەنجامدانی تاوانی کوشتنی سێ هاووڵاتیی خانەوادەیەک لە شاری هەولێر، لە لایەن هێزەکانمانەوە دەستگیر کرا و زانیاریی زیاتر لە داهاتوودا بڵاو دەکەینەوە.

زانیاریی زیاتر: ئاڤا میدیا پێشتر بڵاوکردەوە، بکوژەکە ناوی (ئ.ئ.ع)ـە و تەمەنی نزیکەی 30 ساڵە، کەسێکی نزیکی قوربانییەکانە و نەخۆشیی "شیزۆفرینیا"ی هەبووە.

ئەوەی پێویستە بیزانیت: ناوبراو لە 7ـی ئەم مانگەدا لە کاتی پاککردنەوەی نەخۆشخانەی دەروونیی هەولێر، بە کەلەپچەوە ڕایکردبوو. بەپێی بەدواداچوونەکانی ئاڤا، بکوژەکە دوای ڕاکردنی لە نەخۆشخانە، بەرەبەیانی ڕۆژی یەکشەممە چووەتە سەر ماڵی خێزانی عەبدولڕەحمان عوسمان (ئامۆزای دایکی بکوژ)؛ سەرەتا لە حەوشەی ماڵەکەدا "دلۆڤان"ی کوڕیانی بە 20 چەقۆ کوشتووە و پاشان چووەتە ژوورەوە و عەبدولڕەحمانی باوک و مامۆستا زەینەبی دایکی خنکاندووە و دواتر بە ئۆتۆمبێلێکی جۆری جیتا ڕایکردووە.