ڕووفاتی 155 ئەنفالکراوی دیکە لە بیابانەکانی سەماوە دەردەهێنرێن

ئاڤا نیوز

 

تیمی گۆڕە بەکۆمەڵەکان هەڵدانەوەی دووەم گۆڕی بەکۆمەڵیان لە ناوچەی تەل شێخە لە پارێزگای موسەننا لە باشووری عێراق تەواو کرد و کە  ڕووفاتی 155 ئەنفالکراوی پرۆسەی شاڵاوەکانی ئەنفالی تێدایە.

 

وێنە گەورەکە: هەڵدانەوەی گۆڕە بەکۆمەڵەکان لە بیابانەکانی پارێزگای موسەنا بەردەوامە و تاوەکو ئێستا ڕووفاتی هەزاران ئەنفالکراوی کورد کە بە دەستی ڕژێمی بەعس کۆمەڵکوژ کرابوون، گەڕێنراونەتەوە ناوچەکانیان.

 

ڕاگەیێنراوی فەرمی: دەزگای شەهیدانی عێراق لە ڕاگەیێنراوێکدا ئاماژە بۆ ئەوە دەکات، تیمی کار لە فەرمانگەی کاروبار و پاراستنی گۆڕە بەکۆمەڵەکان، کاریان لەسەر هەڵدانەوەی گۆڕێکی بەکۆمەڵ لە بیابانی سەماوە لە ناوچەی تەل شێخە تەواو کردووە، 155 ڕووفات دەرهێنراون، کە سەرجەمیان ژن و منداڵی کوردن کە لە کاتی پرۆسەی شاڵاوەکانی ئەنفال لە ساڵی 1988 کۆمەڵکوژ کراون.

 

لە ڕاگەیێنراوەکەی دەزگای شەهیدانی عێراق هاتووە: 

 

- ڕووفاتەکان ڕادەستی بەشی پزیشکی دادوەری دەکرێن بۆ ئەوەی نموونەیان لێوەربگرن بەمەبەستی ناسینەوەی قوربانییەکان.
- حەوت گۆڕی دیکە لە هەمان ناوچە دۆزراونەتەوە، دامەزراوەی شەهیدان لە پلانیدا هەیە ئەم گۆڕانەش هەڵبداتەوە.

 

ئەوەی پێویستە بیزانیت: ڕۆژی 22-12-2024، لە ناوچەی تەل شێخە لە قەزای سەلمان لە پارێزگای موسەننا، گۆڕێکی بەکۆمەڵ کە بەم دواییە دۆزرابووەوە، دەستکرا بە پرۆسەی هەڵدانەوەی گۆڕەکە کە ژمارەیەک لە قوربانیانی تاوانی شاڵاوەکانی ئەنفال لەخۆگرتبوو.