شاندی باڵای "چوارچێوەی هەماهەنگی" دەگەڕێتەوە بەغدا و کۆ دەبێتەوە

ئاڤا نیوز

شاندی باڵای "چوارچێوەی هەماهەنگی" بە سەرۆکایەتیی محەممەد شیاع سوودانی، کۆتایی بە سەردانەکەی بۆ هەرێمی کوردستان هێنا و گەڕایەوە بەغدای پایتەخت؛ بڕیارە لە دوو ڕۆژی داهاتوودا سەرکردەکانی چوارچێوەی هەماهەنگی، تاوتوێی ئەنجامی هەردوو کۆبوونەوەی هەولێر و سلێمانی بکەن.

ڕاگەیێنراوی فەرمی: نووسینگەی ڕاگەیاندنی سەرۆکوەزیران لە ڕاگەیەندراوێكدا ئاشكرای كرد: شاندەکەی یاوەری سوودانی، چەندین سەرکردەی دیاری چوارچێوەی هەماهەنگیی لەخۆ گرتبوو، لەوانە هادی عامری، ئەمینداری گشتیی ڕێکخراوی بەدر و موحسین مەندەلاوی، سەرۆکی هاوپەیمانیی "ئەساس"، لەگەڵ ئەمینداری گشتیی چوارچێوەی هەماهەنگی.

زانیاریی زیاتر: بەگوێرەی زانیارییەکان، یەکێک لە تەوەرە سەرەکییەکانی ئەم سەردانە، جەختکردنەوە بوو لەسەر پێویستیی ڕێککەوتن لەسەر کاندیدێکی هاوبەش بۆ پۆستی سەرۆککۆمار، تا چیتر وادە دەستوورییەکان تێنەپەڕن و پرۆسەی هەڵبژاردنی سەرۆککۆمار یەکلا بکرێتەوە.

ئەوەی لەبارەیەوە دەگوترێت: هاوکات چاودێران ئاماژە بەوە دەکەن، یەکێکی دیکە لە ئامانجەکانی سەردانەکە، زانینی هەڵوێست و ڕای لایەنە کوردییەکان بووە سەبارەت بە کاندیدکردنەوەی نووری مالیکی بۆ پۆستی سەرۆکوەزیران، بە تایبەت دوای لێدوانە توندەکانی دۆناڵد ترەمپ دژی کاندیدکردنەوەی مالیکی.

ئەوەی پێویستە بیزانیت: بڕیارە لە دوو ڕۆژی داهاتوودا، سەرکردەکانی چوارچێوەی هەماهەنگی کۆ بببنەوە بۆ تاوتوێکردنی ئەنجامی گفتوگۆکانیان لەگەڵ لایەنە کوردییەکان و داڕشتنی نەخشەڕێگەی کۆتایی بۆ دانیشتنی یەکلاکەرەوەی پەرلەمان، کە چاوەڕوان دەکرێت لە سەرەتای هەفتەی داهاتوودا بەڕێوە بچێت.