ترەمپ: قازانجی سەردانەكەم بۆ سعودیە 500 ملیار دۆلارە

ئاڤا نیوز

 

دۆناڵد ترەمپ، سەرۆكی ئەمریكا ڕایدەگەیێنێ، هۆكاری ئەوەی یەكەم وێستگەی سەردانە نێودەوڵەتییەكانم سعودیەیە ئەوەیە؛ خێری 500 ملیار دۆلاری بۆ وڵاتەكەم هەیە.

 

وێنە گەورەكە: دوای دەستبەكاربوونی وەك 47ـەمین سەرۆكی ئەمریكا، دۆناڵد ترەمپ، نەریتی سەرجەم سەرۆكەكانی پێش خۆی دەشكێنێت و چاوەڕوان دەكرێت سعوديه یەكەم وێستگەی سەردانە نێودەوڵەتییەكانی بێت، كاتێك لە ساڵی 2017ـەشدا كە بۆ یەكەمجار بووە سەرۆكی ئەمریكا، هەمان كاری كرد.

 

لێدوانی فەرمی: دۆناڵد ترەمپ ڕایگەیاند: "ئەوەی باوە؛ یەكەم سەردانی سەرۆكی نوێی ئەمریكا بۆ شانشینی یەكگرتووی بەریتانیا بێت، بەڵام ئەگەر سعودیە ئامادەی كڕینی بەرهەمەكانی وڵاتەكەم بێت بە بڕی 500 ملیار دۆلار، ئەوا یەكەم وێستگەی سەردانەكانم ئەو وڵاتە دەبێت."

 

ئەوەی پێویستە بیزانیت: وەك نەریتێكی باوی ئەمریكا، پاش دەستبەکاربوونی سەرۆکی نوێی وڵات یەكەم وێستگەی سەردانەكانی دەرەوەی بۆ شانشینی یەكگرتووی بەریتانیا دەبێت. بەڵام لە خولی یەكەمی سەرۆكایەتییەكەی، دۆناڵد ترەمپ یەكەم وێستگەی سەردانەكانی بۆ سعودیە بوو، ئەوەش لەبەرامبەر كڕینی بەرهەمەكانی ئەمریكا بە بڕی 450 ملیار دۆلار لەلایەن سعودیەوە.