شاندی هەرێمی كوردستان و عێراق لە كۆبوونەوەدان

ئاڤا نیوز

 

شاندی باڵای حكومەتی هەرێمی كوردستان و وەزارەتی دارایی عێراق لە بەرەبەیانی ئەمڕۆوە تاوەكو ئێستا لە كۆبوونەوەدان و كۆبوونەوەكەی ئەمڕۆ لە هی دوێنێ فراوانتر دەبێت و كاتێكی زیاتر دەخایەنێت.

 

چیرۆكی سەرەكی: ئێوارەی پێنجشەممە 30-1-2025، شاندێكی باڵای حكومەتی هەرێمی كوردستان بۆ یەكلاكردنەوەی پرسی مووچە و گفتوگۆ لەگەڵ بەرپرسانی باڵای عێراق بە سەردانێك گەیشتنە شاری بەغدا، دوێنێ هەینی لە هۆتێل بەغدا كۆبوونەوەیەكی دوو كاتژمێری كرا و ئەمڕۆش لە كاتژمێر (8:00)ەوە كۆبوونەوەی دووەم دەستی پێكردووە و ئەوەی ئەمڕۆ كاتێكی زیاتر دەخایەنێت.

زانیاریی پەیامنێر: دەروون مەلا ناجی، پەیامنێری ئاڤا میدیا لە بەغدا ڕایگەیاند: ئێستا هەردوو شاندی حكومەتی هەرێمی كوردستان و وەزارەتی دارایی عێراق لە كۆبوونەوەدان، چاوەڕوان دەكرێت لە كۆبوونەوەكەدا بەشێك لە گرفتی مووچەی مووچەخۆرانی هەرێمی كوردستان چارەسەر بكرێت، ئەمڕۆ گفتوگۆكان فراوانتر بن لە كۆبوونەوەكەی دوێنێ.

 

زانیاریی زیاتر: بابەتەكانی گفتوگۆی ئەمڕۆی نێوان شاندی هەرێمی كوردستان و عێراق بریتین لەم خاڵانە:

- تەرازووی پێداچوونەوەی مووچەی مانگەكانی ساڵی ڕابردوو.
-شێوازی ئامادەكردنی لیستی مووچە.
-تەواوی شایستە داراییەكانی هەرێمی كوردستان.
- پڕۆژەی هەژماری من.

 

ئەوەی پێویستە بیزانیت: تەیف سامی، وەزیری دارایی عێراق لە كۆبوونەوەكە بەشدار نییە و دوێنێ دوای تەواوبوونی كۆبوونەوەكە بە شاندی هەرێمی كوردستانی ڕاگەیاند كە گەشتی پارێزگایەكی عێراقی هەیە و پێی ناكرێت بۆ كۆبوونەوەی ڕۆژی شەممە ئامادە بێت ئەگەری ئەوە هەیە بۆ كۆبوونەوەی سبەی یەكشەممە 2-2-2025 بەشدار بێت.