تاقیکردنەوەی بەرایی پۆلی 12 بە بەشداریی زیاتر لە 24 هەزار قوتابی دەستپێدەکات

ئاڤا نیوز

 

تاقیکردنەوەی بەرایی ساڵی خوێندنی 2023-2024، لە پارێزگاکانی هەرێمی کوردستان دەستیپێکرد، لە بەشەکانی زانستی، وێژەیی و پیشەیی 24 هەزار و 602 قوتابی مافی بەشداریکردنیان هەیە.

 

وێنە گەورەکە: کاتژمێر 01:00ـی دوانیوەڕۆ تاقیکردنەوەی بەرایی لە هەرێمی کوردستان دەستپێدەکات،  قوتابییانی دەرەکی لە بەشەکانی زانستی، وێژەیی و پیشەیی تاقیکردنەوە بەئامانجی بەشداریکردنی لە تاقیکردنەوەی وەزاری پۆلی 12 دەکەن، تاقیکردنەوەکان ئەمڕۆ 03-03-2024 دەستپێدەکات ڕۆژی 13-03-2024 تەواو دەبێت.

 

بۆچی گرنگە: ئەو قوتابییانەی بەهۆی جیاواز ناتوانن لە نێو ناوەندەکانی خوێندن درێژە بەو پڕۆسەیە بدەن، لە ڕێگەی تاقیکردنەوەی دەرەکیی هەوڵی گەیشتن بە بڕوانامە دەدەن.

 

لێدوانە فەرمییەکان: سامان سیوەیلی، گوتەبێژی وەزارەتی پەروەردەی هەرێمی کوردستان بۆ ئاڤا نیوز گوتی: لە بەشەکانی زانستی، وێژەیی و پیشەیی   24 هەزار و 602 قوتابی دابەشبوونە بەسەر 475 هۆڵی تاقیکردنەوە.

 

دلێر عەبدوڵڵا، بەڕێوەبەری پەروەردەی ناوەندی هەولێر، بۆ ئاڤا نیوز گوتی: "تەنیا لە سەنتەری پارێزگای هەولێر 55 هۆڵ بۆ تاقیکردنەوەی قوتابییان دابینکراون، بۆ هەرسێ زمانەکانی کوردی، ئینگلیزی و تورکمانی."

 

"لە سنووری پارێزگای دهۆک، حەوت هەزار قوتابی بەسەر 144 هۆڵ دابەشبوون." عومەر عەلی، بەڕێوەبەری گشتیی پەروەردەی پارێزگای دهۆک وای بە ئاڤا نیوز گوت.

 

لەلایەكی دیكەوە: ڕاز کەریم، بەڕێوەبەری پەیوەندییەکانی پەروەردەی گشتیی سلێمانی بە ئاڤا نیوزی ڕاگەیاند: "چوار هەزار و 769 قوتابی لەسنووری پارێزگای سلێمانی بەشداريی تاقیکردنەوەکان دەکەن."