پێشەوا هەورامانی: لەمەودوا مووچەی خەڵکی کوردستان لەگەڵ عێراق هاوکات دەکرێت

ئاڤا نیوز

سەبارەت بە ڕێککەوتنەکەی ئەمڕۆی حکومەتی هەرێمی کوردستان و حکومەتی عێراق، وتەبێژی حکومەتی هەرێمی کوردستان ڕایگەیاند، حكومەتی هەرێم ئەركی سەر شانی خۆی جێبەجێ كردووە، سوپاس بۆ خودا ئیرادەی خەڵكی هەرێمی كوردستان نەشكا.

چیرۆکی سەرەکی: دوای پێنج ڕۆژ مانەوە لە بەغدا و چەندین دانیشتن لەنێوانیان، سەرەنجام وەزیری دارایی و ئابووری هەرێمی کوردستان چارەسەرکردنی کێشەی مووچەی فەرمانبەرانی بۆ ساڵی 2025 ڕاگەیاند.

لێدوانی فەرمی: پێشەوا هەورامانی، وتەبێژی حکومەتی هەرێمی کوردستان لە میانی بەشداری کردنی هەواڵەکانی سەعات 07:00ـی ئاڤا میدیا ڕایگەیاند: هەردوولا ڕێککەوتنەکەمان واژۆ کردووە و چارەسەری هەموو کێشەکان کراوە و بەغدا لەم هەفتەیە مووچەی مانگی یەك دەنێرێت.

بەشێکی تری قسەکانی وتەبێژی حکومەتی هەرێمی کوردستان:

- گۆڕانكاری لە مووچەی بەشێك لە مووچەخۆران دەكرێت.

- بە دوو گوژمە مووچەی ئەم مانگە دێت.

- سەرۆكوەزیران مەسرور بارزانی شەڕی مافی مووچەخۆرانی كردووە.

بۆچی گرنگە: ڕێککەوتنی نێوان هەرێمی کوردستان و بەغدا لەبارەی مووچەی فەرمانبەران دەبێتە هۆکاری دڵنیایی بۆ مووچەخۆران و ڕۆڵی دەبێت لە بوژانەوەی بازاڕ.