وەزارەتی دارایی کوردستان: لە نزیکترین کات بەغدا مووچەی مانگی یەک دەنێرێت

ئاڤا نیوز

وەزارەتی دارایی كوردستان ڕایدەگەیێنێت، بڕیارە وەزارەتی دارایی عێراق لە نزیکترین کاتدا پارە بۆ مووچەی مانگی یەک بنێرێت، لەگەڵ گەیشتنیشی لیستی مووچە ڕادەگەیێنرێ و دەست بە دابەشکردنی دەکرێت.

 

لەبارەی ڕێككەوتنی لەگەڵ وەزارەتی دارایی عێراق، ڕاگەیێنراوێكی بڵاوكردەوە و ڕایگەیاند، دوای 15ڕۆژ كاری بەردەوامی شاندە تەكنییەكانی هەردوو وەزارەت، لەسەر شایستە داراییەکانی مووچەخۆرانی هەرێمی كوردستان بۆ ساڵی 2025 گەیشتنە ڕێككەوتنی كۆتایی.

چیرۆكی سەرەكی: دوای 15 ڕۆژ کاری بەردەوامی شاندە تەکنیکییەکانی وەزارەتی دارایی هەرێمی کوردستان و وەزارەتی دارایی حکومەتی فیدراڵ بۆ چارەسەرکردنی کێشە تەکنیکییەکان، جێبەجێکردنی داواکارییەکان، ئامادەکردنی خشتەکان لەبارەی لیستی مووچەی فەرمانبەران، خانەنشینان، هێزە سەربازی و ئەمنییەکان و سوودمەندانی چاودێری کۆمەڵایەتی، دواجار توانرا هەردوولا بۆ ساڵی 2025 بگەنە ڕێکكەوتنی کۆتایی و بڕیارە ئەمساڵ بێ کێشە هەر 12 مووچەکە بنێردرێن.        

ڕاگەیێنراوی فەرمی: بەپێی ڕاگەیێنراوێکی وەزارەتی دارایی كوردستان، لە کۆبوونەوەیەکدا کە ڕۆژی دووشەممە 2025-02-03، لە باڵەخانەی ئەنجوومەنی ئابووریی عێراق کراوە:

٠ شاندی کوردستان بەسەرۆکایەتی ئاوات شێخ جەناب، وەزیری دارایی و ئابووری، سوپاسی هەوڵەکانی  محەممەد شیاع سوودانی، سەرۆکوەزیرانی عێراق، د. فوئاد حوسێن، جێگری سەرۆکوەزیران و تەیف سامی، وەزیری داراییان کرد، کە هاوکار و هەماهەنگ و پشتیوان بوون بۆ ئەوەی لەسەر شایستەی مووچەخۆرانی هەرێمی کوردستان بۆ ساڵی 2025 بگەنە ڕێكکەوتن.                    

٠ شاندی کوردستان سوپاسی دەستەی سەرۆکایەتیی ئەنجوومەنی نوێنەرانی عێراق و فراکسیۆنە جیاوازەکانی ناو پەرلەمانی عێراق دەكات کە هاوکار و پشتیوان بوون بۆ پەسەندکردنی هەمواری یاسای بودجە بەتایبەت بڕگەی تایبەت بە هەناردەکردنەوەی نەوتی کوردستان.

٠ تیمە تەکنیکییەکانی وەزارەتی دارایی هەرێمی کوردستان سەرقاڵی تەواوکردنی ڕێکارەکانی ناردنی تەمویلی مووچەی مانگی یەکی ساڵی (2025)ـن و چاوەڕوان دەکرێت لە نزیکترین کاتدا تەمویلەکە بخرێتە سەر هەژماری بانکیی وەزارەتی دارایی هەرێمی کوردستان، بە گەیشتنی تەمویلەکە، ڕاستەوخۆ دەست بە دابەشکردنی مووچە دەکرێت.