ماکرۆن سەردانی بەغدا و هەرێمی کوردستان دەکات

ئاڤا نیوز

 

نوێنەری حکومەتی هەرێمی کوردستان لە فەرەنسا دەڵێت: ئیمانیۆل ماکرۆن، سەرۆکی فەرەنسا سەردانی عێراق و هەرێمی کوردستانیش دەکات.

 

وێنە گەورەکە: لەسەروەختی ڕاپەڕینی ئاداری 1991، فەرەنسا ڕۆڵی کاریگەری هەبوو لە دەرچوونی بڕیاری 688، لەو کاتەوە پەیوەندییەکی بە‌هێز لەنێوان هەرێمی کوردستان و فەرەنسا بەردەوامی هەیە.

 

لێدوانی فەرمی: د.عەلی دۆڵەمەڕی، نوێنەری حکومەتی هەرێمی کوردستان لە فەرەنسا بە ئاڤا میدیای وت؛ بڕیارە لەمیانی کۆنگرەی بەغدا-3 ئیمانیۆل ماکرۆن، سەرۆکی فەرەنسا بەشداری بکات، لەگەڵ ئەوەدا دێتە هەرێمی کوردستانیش، بەڵام هێشتا کاتەکەی دیاری نەکراوە.

 

خاڵە ئەرێنییەکان: نوێنەری حکومەتی هەرێمی کوردستان لە فەرەنسا ئەمانەشی وت: 

- تا ئێستا 12 کۆبوونەوە لەنێوان سەرۆکی هەرێم و سەرۆکی حکومەتی هەرێمی کوردستان و سەرۆکەکانی فەرەنسا هەبووە، سێ جاریش سەرۆکەکانی فەرەنسا هاتوونەتە هەرێمی کوردستان.
-    هاوکارییەکانی فەرەنسا بۆ هێزی پێشمەرگە ناوەستێت، بەڵکو زیاتریش دەبێت.
-    لەگەڵ کۆمپانیا پیشەسازییەکانی فەرەنسا لە گفتوگۆداین بۆ ئەوەی بێنە کوردستان، ئێستا زیاتر لە 30 کۆمپانیای فەرەنسی لەبواری جیاواز لە هەرێمی کوردستان کاردەکەن.
-    فەرنسا بەزۆری کەس دیپۆرت ناکاتەوە، لەبەرئەوەی عێراق یەکێکە لەو وڵاتانەی هێشتا مەترسی تێدایە.

 

ئەوەی پێویستە بیزانیت: هەرێمی کوردستان لەگەڵ فەرەنسا جگە لە بواری سیاسی و بازرگانی، لە ڕووی کلتوریی و پەروەردەییەوە پەیوەندییەکی بە‌هێزیان هەیە. "لە زانکۆی ئینالکۆ لە پاریس بەشی کوردی هەیە بە دیالێکتی  سۆرانی و بادینی دەرسی لێ دەخوێندرێت. لە هەرێمی کوردستان جگە لە کونسوڵخانەی فەرەنسا، ئینستتیوتی کلتوری و شوێنەواری هەیە جگە لەوە دوو قوتابخانەی فەرەنسیش هەیە" د.عەلی دۆڵەمەڕی ئەمەی وت.