هەرێمی کوردستان ڕۆژانە ملیۆنێک و 500 هەزار لتر بەنزین بەرهەم دەهێنێت

ئاڤا نیوز

وەزیری سامانە سروشتییەكانی حكومەتی هەرێمی كوردستان ڕایدەگەیێنێت، ئەو 50 هەزار بەرمیل نەوتەی كە ڕۆژانە كۆمپانیای سۆمۆ بۆ پێداویستی ناوخۆ بە هەرێمی كوردستانی دەداتەوە، بڕەكەی لە خواستی ناوخۆ كەمترە و بەغداش بەنزین بۆ هەرێمی كوردستان نانێرێت.

وێنە گەورەكە: لەچوارچێوەی ڕێككەوتنی سێقۆڵی بۆ هەناردەكردنەوەی نەوتی هەرێمی كوردستان، ڕۆژانە بڕی 50 هەزار بەرمیل نەوتی بەرهەمهێنراو بۆ بەكارهێنانی ناوخۆ دەگەڕێنرێتەوە.

ئەوەی پێویستە بیزانیت: بەر لە هەناردەكردنەوەی نەوتی هەرێمی كوردستان، ڕۆژانە 65 هەزار بەرمیل نەوت بۆ بەكارهێنانی ناوخۆیی دەپاڵێورا، بەڵام حكومەتی فیدڕاڵ پێداگربوو لەوەی بڕی تەنیا 46 هەزار بەرمیل نەوتی ڕۆژانە بۆ پێداویستی ناوخۆی هەرێمی كوردستان دیاری بكرێت، دواتر هەردوو حكومەت لەسەر بڕی 50 هەزار بەرمیل نەوت ڕێككەوتن، ئەوەش لەكاتێكدایە وەزارەتی نەوتی عێراق، بۆ پارێزگاكانی ناوەڕاست و باشوور ڕۆژانە 800 هەزار بەرمیل نەوت دەپاڵێوێت.

لێدوانی فەرمی: كەمال محەممەد، وەزیری سامانە سرووشتییەكانی حكومەتی هەرێمی كوردستان تایبەت بە ئاڤا ڕایگەیاند، لەچوارچێوەی ڕێككەوتنی هەولێر و بەغدا لەسەر پرسی نەوت باس لەوە كراوە، كە ئەگەر هاتوو بڕی 50 هەزار بەرمیل نەوت، بەشی پێداویستی ڕۆژانەی هەرێمی كوردستانی نەكرد، ئەوا حكومەتی فیدڕاڵ قەرەبووی بەرهەمە نەوتییەكان بۆ هەرێمی كوردستان دەكاتەوە و سووتەمەنی دابین دەكات، بەڵام تا ئێستا ئەوەی نەكردووە.

- لەو بڕە نەوتەی كە بۆ بەكارهێنانی ناوخۆیی گل دەدرێتەوە، ڕۆژانە یەک ملیۆن و 500 هەزار لتر بەنزین بەرهەمدەهێنرێت كە بە نرخی پاڵپشتیكراو بە (750 دینار) بەسەر بەنزینخانەكانی دابەش دەكەین، بەڵام ئەو بڕە لە پێداویستیی ناوخۆیی كەمترە.

وردەكاریی زیاتر: بڕی ملیۆنێک و 500 هەزار لتر بەنزینی بەرهەمهێنراو بەمجۆرە بەسەر پارێزگاكانی هەرێمی كوردستان دابەش دەكرێت؛ پارێزگای دهۆك: 380 هەزار لتر، پارێزگاكانی سلێمانی و هەڵەبجە: 500 هەزار لتر، پارێزگای هەولێر و ئیدارەی سەربەخۆی سۆران: 620 هەزار لتر. هاوکات هەرێمی كوردستان ڕۆژانە پێویستی بە بڕی سێ ملیۆن لتر بەنزین هەیە.